Ubona kuzosiza iBanyana ukwanda kwabaphesheya
UKWANDA kwesibalo sabadlali beqembu lebhola lesizwe labesifazane abadlala kumaligi angaphandle kwaseNingizimu Afrika kwenyusa ithuba lokuthi lizibekisele indawo kwiNdebe yoMhlaba okokuqala emlandweni.
Lona ngumbono ka-Amanda Dlamini owayengukaputeni weBanyana Banyana ngesikhathi iya okokuqala kuma-Olympic ngo-2012 eLondon.
“Besilokhu sisala kancane ekutheni siye kwiNdebe yoMhlaba kodwa kulokhu ngibona sinethuba elihle. Abadlali abaphesheya bazobuya nesipiliyoni esikhulu ngoba izinga lokudlala kumaligi abo liphezulu. Yilokhu esikudingayo,” kusho uDlamini.
Ubekhuluma ngemuva kokuthi umqeqeshi weBanyana, uDesiree Ellis eqinise iqembu lakhe elizodlala kwiCosafa Cup, ngabadlali abazinze phesheya.
Ulande ukaputeni uJanine van Wyk, Thembi Kgatlana noLinda Motlhalo bonke abadlala kwiHouston Dash e-USA.
UKgatlana noMotlhalo bajoyine iDash kulo nyaka kanti uRefiloe Jane usanda kuthola inkontileka neqembu laseAustralia iCranberra. Lawa ngamazwe anamaligi angcono ebhola labesifazane uma kuqhathaniswa nelakuleli elingenaso isigaba esiphezulu.
Imidlalo yeCosafa izoba ngoSepthemba 12-22 ePort Elizabeth kanti umqeqeshi uDesiree Ellis uthe izofana neyokucijela eyokuhlungela iNdebe yoMhlaba.
INdebe yoMhlaba eseFrance ngonyaka ozayo izohlungelwa nge-African Women Champions League engoNovemba ezweni elisazomenyezelwa.
Kudingeka amazwe amathathu azoya komela i-Afrika eFrance.
Okuchaza uDlamini kakhulu ngokwanda kwabadlali besifazane abaya phesheya wukuthi bazibambela mathupha.
“Akekho okukhuluma ngemenenja. Kuyakhombisa ukuthi abantu besifazane baqine kangakanani. Bayakwazi ukuzenzela izinto. Kuqale uJanine wahamba. Nabanye manje sebeyalandela. Iqembu lethu lizoqina kakhulu kunakuqala,” kusho uDlamini.
KwiCosafa iBanyana iqhathwe neBotswana, Madagascar neMalawi. Nyakenye elakuleli lanqoba isicoco ngaphansi kobuholi buka-Ellis okwenze wanikwa umsebenzi ngokugcwele ngemuva kokubamba isikhathi eside.