Uvalo kudlwengulwa izingane
UTHUKA izanya umphakathi waseNtshangwe ngaphandle kwaseThekwini kulandela izigameko zokudlwengulwa kwezingane ezintathu okusolwa umshayela weloli ongaziwa ngazo.
Izingane ezingomakhelwane kuthiwa uzidlwengule ngoMgqibelo maqede wazisabisa ngokuthi uzozibulala uma zibikela abazali ngokwenzekile.
Kuthiwa kudlwengulwe ingane yomfana eneminyaka engu-10, nentombazane eneminyaka eyisishiyagalombili neneminyaka eyisithupha.
Umphakathi wakule ndawo kuthiwa usuyazifihla izingane zawo kulandela lezi zigameko.
“Ingane yokuqala engumfana kuthiwa ibithunywe esitolo yahlangana nalo muntu wayithatha wayifaka elolini. Wapaka emgwaqweni wabe eseyidlwengula. Isibuyela kubo le ngane yomfana ayibange isabika. Kuthiwa umsolwa uqhubekile wangena komunye umuzi kukhona izingane zamantombazane ezimbili, abadala behlezi kwenye indlu. Kuthiwa ube esewadlwengula amantombazane,” kusho umthombo.
Okhulumela amaphoyisa, uCaptain Nqobile Gwala, ukuqinisekisile ukuthi kuvulwe icala ngokudlwengulwa kwamantombazane.
Amaphoyisa athe elinye icala lokudlwengulwa kwengane yomfana belisavulwa izolo, kusalindwe ukuba iyiswe esibhedlela ukuze kuphothulwe ukuvulwa kwalo.
Isolezwe imindeni yezingane yathi ishaqekile ngokwenzekile.
Umndeni wamantombazane amabili uthe amantombazane aphume esememeza umshayeli weloli osolwayo esebaleka ngayo.
“Bebehlezi bobabili endlini, wadlwengula oyedwa oneminyaka lithinte eyisishiyagalombili, lo munye ekhona. Kuthe eseqala edlwengula yena kwaba khona okumphazamisayo umsolwa waphuma wabaleka nephenti lenye ingane. Izingane ziphume zikhala umsolwa esebaleka ngeloli. Akazange atholakale,” kusho isihlobo sezingane. Kwenzeka lokhu nje kuthiwa ubeqale ngokudlwengula ingane yomfana ebithunywe amaphilisi esitolo. “Ingane isitshele ukuthi lo malume uyiphoqe ukuba ingene elolini lakhe wayisabisa ngesibhamu wabe eseya kwenye indawo ethule nokuyilapho efike wayidlwengula khona,” kusho umzali.
Kuthiwa umfana ufike ekhaya wangabatshela ukuthi kwenzekeni.
Umfana kuthiwa uzwakale esekhala ngezinhlungu ebusuku.
Izolo umndeni ubusesiteshini samaphoyisa eNtshangwe uvula icala lokudlwengula.
Umthombo weSolezwe kule ndawo uthe banovalo lokuthi ziningi izingane ezigilwe wumsolwa.
“Sikhathazekile ngoba asazi ukuthi umkhuba wokudlwengula izingane uqale nini njengoba sekuvela izingane ezintathu okuthiwa zihlukumezekile. Kusiphethe kabi lokhu, siyesaba,” kusho umthombo.