Izinyunyana zilwela ukuphepha kwabeminyango kahulumeni
IZINYUNYANA zicele abasebenzi beminyango kahulumeni ukuthi bangalokothi baye emabhilidini angaphephile emuva kokusha kwebhilidi laseGoli ngesonto eledlule.
Isitatimende esithunyelwe yiNational Education, Health and Allied Workers Union (Nehawu) kwabezindaba sithe kusukela ngoAgasti 15 itshele amalungu ayo ukuthi angasebenzeli emabhilidini kahulumeni angaphephile.
“Sizoqhubeka nokucela uhulumeni ukuthi afake abantu emabhilidini aphephile ngoba le nto yokuthi basebenzele emabhilidini angekho ezingeni elifanele lezokuphepha nezempilo ayamukelekile. Inkantolo isivunile ngoLwesine yathi abasebenzi mabangayi emabhilidini angaphephile ngakho siyacela bahlale emakhaya,” kusho iNehawu esitatimendeni.
Ithe emuva kokusha kwebhilidi iBank of Lisbon elisenkabeni yeGoli, ikubona kubalulekile ukuthi abasebenzi bahlale emakhaya kuze kuphuculwe izinga lezokuphepha lapho besebenzela khona.
Umlilo waseBank of Lisbon ubulale izicishamlilo ezintathu okungoMnuz Simphiwe Morapane (28), Mduduzi Ndlovu (40) noKhathutshelo Muedi (37).
IBank of Lisbon ibinamahhovisi oMnyango wezeMpilo, owezokuHlaliswa kwaBantu nawokuBusa ngokuBambisana nezoMdabu.
INehawu ithe isebenzisana nezinye izinyunyana ukuqinisekisa ukuthi abasebenzi basebenzela emabhilidini aphephile.
Ithe amalungu ayo azoqhubeka asayine irejista njalo ekuseni kodwa ngeke angene emabhilidini angaphephile azoqhinqa ngaphandle kwawo aze ayiswe emabhilidini aphephile.
Kuleli sonto kulindeleke ukuthi iNehawu ibe nomhlangano noNgqongqoshe wezeMpilo, uDkt Aaron Motsoaledi.
Khonamanjalo, kulindeleke ukuthi inkonzo yesikhumbuzo yezicishamlilo ezishone ngesonto eledlule ibe ngoLwesithathu eGoli.
(Funda umbono wephephandaba)