ISikebhe sifuna ukulekelela amaphoyisa kwelokufa kwenyanga
INDABA yokubulawa kwenyanga yaseMphondi, eNquthu, isingenelwe yiSikebhe esithembisa ukulekelela amaphoyisa ukuze kubanjwe ababulali.
Lokhu kuvele ngesikhathi kunenkonzo yomngcwabo kaMnuz Senzo Mncube ngoMgqibelo.
UMncube uhlaselwe kubo esendlini abelele kuyo nesiguli sakhe. Izigebengu zifike zamgwaza, zamnquma uqhoqhoqho zase zimshisa nendlu.
Abahlaseli kuthiwa badlwengule isiguli (20) bashintshana ngaso.
USihlalo weSikebhe, UMnuz Joe Masiteng, uthe bafuna ukwenza isiqiniseko sokuthi ababulali bayabanjwa bajeze.
“Sithukuthele kakhulu ngesihluku sokubulawa kwalo mfana, yingakho siyinhlangano iSikebhe sizimisele ukungenelela sithungathe ababulali,” kusho uMasiteng.
Isimo sishubile endaweni emuva kokuxoshwa kukamakhelwane osolwa ngokuthinteka ekufeni kukaMncube.
Kuthiwa umakhelwane ubezolekelela kuthuthwa amatshe abezofakwa ethuneni kodwa waxoshwa yizinsizwa zomndeni ngoba zimsola ukuthi uyathinteka ekufeni kukaMncube.
Uyisemkhulu kaMncube, uMnuz Meshack Shabangu, ucele ukuba umndeni wehlise umoya wathi bayakuqonda ubuhlungu ababuzwayo.
Isidumbu sikaMncube singcwatshwe singaphelele. Ikhanda kuthiwa beliwuhhafu, imilenze nezingalo kwasha kwangqongqa.
Abaseshi bathe izinsolo ezikhona ziphazamisa uphenyo lwabo. “Kuningi esesikuzwile okushiwoyo. Okunye wukuthi bafuna intombazane eyayinomufi. Lokho kuyingozi ngoba kuzolimaza uphenyo,” kusho iphoyisa elingagunyaziwe ukukhuluma nabezindaba.
Okhulumela amaphoyisa KwaZulu-Natal, uCaptain Nqobile Gwala, uthe akukaboshwa muntu kodwa uphenyo luyaqhubeka.