Iphoyisa linconywe ngokuba yiqhawe
IPHOYISA lesiteshi saseBrighton Beach elajaha izigebengu lathola imoto eyayilahlekile yize lalingekho emsebenzini linconywe ngokuba yiqhawe elisebenza ngokuzikhandla .
UConstable Sduduzo Makhaye (37) ube yiphoyisa elivelele emcimbini wokuklonyeliswa kwamaphoyisa asebenza ophikweni oluthungatha izimoto ezisuke zilahlekile amaTracker/ SAPS Awards abeseCoastlands Hotel eMusgrave, eThekwini, ngoLwesihlanu.
UMakhaye, ohlala eMlaza, ngoJulayi wayehlezi ekhaya emuva kokulimala esemsebenzini. Wezwa ukuthi kunemoto elahlekile efunwa ngamaphoyisa, oyishayelayo obaleke waya ngaseMlaza.
UMakhaye, owayexhuga ehamba ngezinduku, wangena emotweni yakhe wayolekelela ekufuneni imoto eyayilahlekile.
“Ngoba ngiyawazi uMlaza ngavele ngasheshe ngayithola imoto, abasolwa bengibona bazama ukungidubula, bagcina bebaleka. Imoto ngakwazi ukuyithola,” kusho uMakhaye.
Uthe kumjabulise kakhulu ukuklonyeliswa nge-Individual Award ngenxa yomsebenzi wakhe.
“Ngiyawuthanda kakhulu umsebenzi wami futhi ngiwenza ngokukhulu ukuziqhenya nokuzimisela. Kungijabulisile ukuthi nginconywe ngale ndlela. Ngizoqhubeka ngisebenze kanzima,” kusho uMakhaye.
Uthe ubonga uNkulunkulu ngokumvikela emsebenzini wakhe ngoba uyingozi.
“Sihlezi silimala ngoba izigebengu uma zibona ukuthi siyazijaha ziyadubula. Ngineminyaka ewu-10 ngiyiphoyisa elibhekelele kakhulu ukuntsontshwa kwezimoto. UNkulunkulu nje osangigcinile ngoba ngisaphila,” kusho uMakhaye.
Abanye abaklonyelisiwe yiCluster yaseMpangeni ehambe phambili kwi-Unit Award no-Warrant Officer Matthew Rose waseNewcastle othole iLifetime Achievement.
Isikhulu esiphezulu sakwaTracker, uMnuz Knott Craig, sithe basebenzisana kahle nangokubambisana namaphoyisa ukuqinisekisa ukuthi izimoto zabantu ezilahlekayo ziyatholakala.
“Kumele sibambisane sonke ekulweni nobugebengu. Siye sikhohlwe ukuthi kuningi amaphoyisa akwenzayo ukugcina umphakathi uphephile,” kusho uCraig.
Umcimbi kazwelonke uzoba ePitoli ngo-Okthoba. Kulindeleke ukuba laba abahlomule KwaZulu-Natal baqhudelane namanye amaphoyisa akwezinye izifundazwe.