I-DFF ka-2018 izolwa nokuntuleka kwamathuba omsebenzi ngokugqugquzela intsha ukuba ingene kwezamabhizinisi
UKUVUSELELWA komkhakha wemfashini kuza namathuba ebhizinisi kanti iDurban Fashion Fair (DFF) izoba yingxenye yeDurban Business Fair (DBF) izogqugquzela intsha enethalente ukuthi isungule amabhizinisi athi yona ukuze kuliwe nenkinga yokuntuleka kwamathuba omsebenzi.
Kulo nyaka iDFF izoqala ngoSepthemba 19 iphele ngoSepthemba 22 eNkosi Albert Luthuli International Convention Centre(ICC).
Uzobe ibophele abasiki bengqephu abangu-40 baseNingizimu Afrika nabayisishiyagalolunye bakwamanye amazwe ase-Afrika.
Kuzobe kukhona abasiki bengqephu abangaconsi phansi okubalwa kubo o-Amanda Laird Cherry, Karen Monk Klingstra noChu Suwannapha kodwa abasiki bengqephu abaningi yilabo abaneminyaka engaphansi kuka-35.
Ucwaningo lweStats SA luveza ukuthi ukuntuleka kwemisebenzi kubantu abaneminyaka engu-15 kuya ku-34 kumi ku-40%.
ITheku libesibalo esiphezulu sabantu abasha abaneziqu zemfundo ephakeme liphinde libe nezikhungo zemfundo ephakeme eziningi. IMeya yeTheku uNkk Zandile Gumede uthe iyaziqhenya ngohlelo lokuhlonyiswa ngamakhono kwabasiki bengqephu abasafufusa kwiDFF.
Njalo ngonyaka kukhethwa abasiki bengqephu abanethalente ukuze bahlonyiswe ngamakhono azobasiza ukuthi baphumelele emkhakheni wemfashini. Bangaphezu kuka-200 abasiki bengqephu abangene kulolu hlelo. Baqeqeshwa yizazi zengqephu ezingu-20.
Indikimba yeDFF kulo nyaka uthi Afrofuturism. IMeya yeTheku I the kukhethwe lendikimba ngoba “Sihlale sizwa nge-industrial revolution nokuthi ubuchwepheshe besimanje buzoshinsha izimboni ezihlukene. Kwesinye isikhathi kubalulekile ukuthi siqale ngalokho esikwazi kangcono njengomkhakha wemfashini ukuze intsha yethu idale amathuba omsebenzi.Asinazo izinkampani ezinkulu zezimpahla kodwa sifuna ukuzakhela ezethu izimboni ngokuhlomisa intsha ngamakhono emfashini,” kusho uNkk Gumede.
Kusukela isungulwa iDFF yayidalelwe ukuheha izintatheli, abathengi bemfashini nayo yonke imboni yendwangu kanjalo namalungu omphakathi nakulo nyaka izoqhubeka kulokho.
Izophinde ifundise abantu ngokubaluleka kokuthenga impahla eyenziwe kuleli nomthelela oba semnothweni ngokuthengwa kwempahla eyenziwe kwamanye amazwe.
Eminye imininingwane itholakala ekhasini elithi @Dbnfashion_fair naku durbanfashionfair.com