Ayingitwetwisi eyokudlala neNigeria: Amrouche
UYIFUNA esitikini iNigeria umqeqeshi weLibya, u-Adel Amrouche, othe akumtwetwisi ukubhekana nayo emidlalweni elandelayo yokuhlungela i-Africa Cup of Nations (Afcon) ezoba seCameroon ngonyaka ozayo.
U-Amrouche, obelokhu ebabaza ubuhle babadlali beNingizimu Afrika, ubekhuluma nabezindaba ngoMgqibelo ngemuva kokubambana ngo 0-0 neBafana Bafana kowokuhlunga eMoses Mabhida Stadium, eThekwini.
ILibya iyona esiqhwakele ngamaphuzu amane kuGroup E oneNigeria, iNingizimu Afrika neSeychelles.
INigeria ibuyele embangweni wokuya eCameroon ngemuva kokushaya iSeychelles ngo 3-0 komunye umdlalo weqoqo obungempelasonto. AmaSuper Eagles ayeqale umkhankaso wawo wokuhlunga ngenduku eshayelwa ekhaya yiBafana Bafana nayo esinamaphuzu amane. ISeychelles, edlala induku, isemsileni. Emidlalweni ezayo ngo-Okthoba iSeychelles izobhekana neBafana ekhaya nasekuhambeni. Ngaleso sikhathi iLibya izobanga amaphuzu namaSuper Eagles.
“Ngincamela ukudlala neNigeria kunokudlala neBafana Bafana ngoba senginawo amava okubhekana neNigeria. Kunzima ukudlala neBafana ngoba inabadlali abahle. INigeria ngiyilindele noma ngabe ifuna ukuyidlalela eNigeria yomibili imidlalo, kulungile. Bakholelwa kwijuju. Thina sikholelwa kuNkulunkulu nasekusebenzeni kanzima,” kusho u-Amrouche.
ILibya ayikwazi ukuba nemidlalo yayo yasekhaya kuleli lizwe ngenxa yezinkinga zombusazwe ezikhona. Imidlalo yayo yasekhaya isikhathi esiningi iba seCairo.
U-Amrouche, oseke wamiswa izinyanga eziwu-12 yiCAF ngoba esolwa ngokuthimisela unompempe ngamathe, akazange akufihle ukuthi yena akukunqeni ukusho into ayicabangayo.
Uthe uyazi ukuthi kukhona abazomsola ngokulokhu encoma umqeqeshi weBafana, uStuart Baxter, ngokwenza umsebenzi omuhle.
“Ngibe nobusuku obude ngicabanga ukuthi sizomvimba kanjani uVilla (Sibusiso Vilakazi), (Keagan) Dolly no (Percy) Tau. Ngiyalihlonipha leli qembu. Ngiyazi ukuthi kukhona engingacoshi kubona amaphuzu ngalokhu ngoba bafuna ngithi umqeqeshi wenza umsebenzi omubi kodwa ngikuqonda kahle engikushoyo. Wenze umsebenzi omuhle,” kusho u-Amrouche.
Uthe abantu kumele babekezele ngoba “insimba ibanjwa amagoda ebolile”.