Okubhekwe ukuthi awine isicoco usejoyine ijimu kaNomakanjani
UMSHAYISIBHAKELA wase-East London ongaconsi phansi kubalandeli, u-Azinga “Golden Boy” Fuzile, okubhekwe ukuthi awinele iNingizimu Afrika isicoco somhlaba esilandelayo, usejoyine ijimu kaCollin “Nomakanjani” Nathan.
UFuzile ubekade eqeqeshwa nguMzamo “Chief ” Njekanye e-Eastern Cape, eqhathwa nguTeris Ntuthu weRumble Africa Promotions. EGauteng usezocijwa eBronx Gym, ahlelelwe izimpi yiGolden Gloves Promotions kaRodney Berman esikhiqize ompetha abaningi bomhlaba.
Kubashayisibhakela base-Eastern Cape abasejimini kaNathan kukhona umpetha we-Intermational Boxing Organisation (IBO) strawweight, uSimphiwe “Chain Reaction” Konco, odabuka eMthatha. UXolisani “Nomeva” Ndongeni, owayekade ekhuliswe nguNjekanye ufudukele kuNathan kodwa washiya bengasabhekani emuva kokuthi exabane nophromotha uBerman ngenxa yokungazitholi izimpi.
Emasontweni edlule uNathan uthe unohlelo lokubeka esicongweni uFuzile futhi uzosebenzisa abantu abaziwa esibhakeleni somhlaba ukumtholela izimpi ezinkulu. UNathan uphinde wadalula ukuthi useyashiya ekubeni wumqeqeshi ekupheleni konyaka ngoba usefuna ukugxila enkampanini yokuphatha amabhokisa asanda kuyisungula iNo Doubt Management.
Phezu kokuba bekulokhu kuvela ukungezwani phakathi kukaFuzile noNjekanye kodwa konke kunyathelwe ngezinyawo. Ezinyangeni ezedlule kuputshuke ukuthi uFuzile unqabile ukukhokhela uNjekanye u-25% wakhe okufanele awuthole njengomqeqeshi nemenenja emuva kwempi.
Esitatimendeni esikhishwe yiRumble Africa, uNtuthu usicacisile isizathu sokudedela uFuzile ukuthi ayonziza eGauteng.
“Sikucacisile empini yethu edlule ukuthi sinobudlelwano obuhle bokusebenzisana noCollin “Nomakanjani” Nathan. Sifuna ukunazisa ukuthi i-RAP, DVBA-Chief, KC Cengani namabhokisa athintekayo u-Azinga Fuzile noKhanyile Bulana sikubone kufanele abashayisibhakela bethu ukuze bakhule ukuthi bafudukele eGauteng beyosebenza noNathan ukulungiselela izimpi zabo ezizayo. UNathan uzosebenza ngokubambisana noChief Njekanye noKC Cengani,” kusho uNtuthu esitatimendeni.
Ukufuduka kukaFuzile akwemukelwanga kahle ngabalandeli besibhakela e-East London ngoba kukhona abakholwa wukuthi sekuzoba wukushabalala kwekusasa lakhe. Nonyaka uNathan uwinise uHekkie “Hexecutioner” Budler ibhande le-International Boxing Federation (IBF) light flyweght, World Boxing Association (WBA) nele-The Ring Magazine. Kade esekhoneni likaMoruti “Babyface” Mthalane ngesikhathi ewina ele-IBF flyweight.