Kuboshwe nekhansela le-ANC ngelokubulala
I-ANC izwakalise ukushaqeka ngokuboshwa kwekhansela layo elikuMasipala waseMsunduzi elibekwe icala lokubulala uMnuz Msawenkosi “Maqatha Awaziqobi/Qashana” Mchunu owayeyisishoshovu se-ANC owabulawa ngentululwane yezinhlamvu ngoMeyi.
Isolezwe lithole ukuthi ikhansela livele kafushane enkantolo yeMantshi yaseMgungundlovu izolo nabanye abasolwa abayisithupha.
Kuvela ukuthi ikhansela lihlala ku-ward 10 eMsunduzi lapho kwakuhlala khona uMchunu kanti liboshwe ngeSonto namanye amadoda ayisithupha nawo ahlala kule ndawo.
Kuthiwa phakathi kwababoshiwe kukhona unogada wekhansela nendodana yePhini leMeya yaseMgungundlovu.
Esitatimendeni, ukhulumela i-ANC eKZN, uNkk Nomagugu Simelane-Zulu, uthe bashaqekile ngokuboshwa nokubekwa icala kwekhansela labo elisebenza eMsunduzi futhi bazoyeka umthetho ukuthi usebenze.
“Sicela amalungu ethu asebenzisane nezinhlaka zomthetho kulolu daba. Yize sikholwa wukuthi wonke umuntu umsulwa kuze kube ulahlwa yicala kodwa lezi zinsolo zinzima futhi zidinga ukubhekisiswa. IKwaZulu-Natal inezigameko eziningi zokubulawa kosopolitiki futhi amaqabane ethu abulawayo,” kusho uNkk Simelane-Zulu.
Uthe bayathemba ukuthi izinhlaka zomthetho zizokwenza konke okusemandleni ukuqeda ukubulawa kosopolitiki ukuze ne-ANC iqale izinhlelo zayo zokuqondisa ubugwegwe ngaphakathi ithumele umyalezo oshubile kwabathintekayo.
Ugqugquzele amalungu e-ANC ukuthi abe yisibonelo esihle emphakathini wathi ukuthinteka kwekhansela labo ecaleni lokubulala kuyaphoxa futhi kukhombisa ngokusobala ukuthi lolu daba kufanele lusukunyelwe.
“Sizoqhubeka nomkhankaso kaThuma Mina wokugqugquzela amalungu e-ANC ukuthi avikele inkululeko yabantu nokuthi aqinisekise ukuthi bonke abantu abahlukumezeki,” kusho uNkk Simelane-Zulu.