Usuke umthinte elunda umuntu uma umthakazela
AKE sikhe embizeni yobuntu. Imbiza yobuntu iphaswe ngamaseko amaningi. Ubuntu bususelwa egameni likakhokho wabantu uNtu. Wayemnyama tsu uNtu. Wayemude enezinwele ezimnyama tsu. Akubona bonke abantu base-Afrika abamnyama abangabantu. Abantu yilabo abadabuka kuye lo Ntu, abaphila impilo yesintu. Banezimpawu ezibenza behluke kwabanye base-Afrika. Banonwele olufishane olumnyama oluphothene. Banamakhala amakhulu avulekile. Banezindebe eziwugqinsi. Banezinqe nezisu ezinkulu ukuze bagcine amanzi. Bansundu ngebala. Ukuthi bangabantu akuchazi ukuthi abanye, abangazalwa yilo Ntu, bayizilwane. Igama labo ukuthi abantu. Lesi siqu sivela ngezindlela eziningi ezilimini zabantu. NgesiSwahili bathi “mto”. NgesiSuthu bathi “motho”. NgesiXhosa bathi “umntu”.
Phakathi kwamaseko embiza yobuntu kukhona inhlonipho, inhlanzeko, nokuhlangana. Inhlonipho ihamba phambili. Ingaphezu kwesiko ngendlela eyaziswa ngayo. Izigaba zabantu ngokuzalana nobuntanga ziqhakambisa yona le nhlonipho. Kulindeleke ukuba isigaba esincane kunesinye sithobele esidala. Lokhu kwakha ukwazisana. Umuntu omdala unikwa indawo yakhe. Akabizwa ngegama kepha ngesihlonipho sakhe. Uma eyindoda ubizwa ngobaba noma ngesibongo nesithakazelo sakhe. Umuntu wakwaZungu umhloniphe wamqeda uma uthi kuye Gwabini. Zonke izikhundla anazo emphakathini aziyilutho kunesithakazelo sakhe. Usuke umthinte emanonini ngoba ukhombisa ukumhlonipha okungayiwa njengoba wazi isithakazelo sakhe.
Lapho ungena emzini womuntu uyakhuleka, ukhombise ukuhlonipha abaphilayo nabalele. Uhlonipha konke abakuhloniphayo abomndeni. Bahlonipha izindlu, isibaya, iziko, amathuna negceke lonke. Ngokuhlonipha igceke indoda iyasikhumula isigqoko lapho ingena emzini womuntu. Ayingeni ingangeniswanga. Inikwa indawo yokuhlala, yenze njengoba kushiwo. Noma ngabe uyamehlula umnumzane wakulowo muzi owuhambele, awukuqhakambisi loko. Umthathisa okwenkosi yakho ngoba lo muzi awakhile akuwona owakhe. Naye uyawuhlonipha, akenzi umathanda.
Inhlonipho yakomkhulu ingaphezu kokwenza. Inkosi nguyena muntu omdala esizweni. Inkosi yinkosi ngabantu. Njengoba beyihlonipha yona ithobeke ngaphezu kwabo. Ingabusa bani bengekho? Ingumlomo ongathethi manga. Ekushoyo ikuzwe ngabantu bayo. Kufika nezinduna kuyona, zikuthathe emadodeni, amadoda ekuthathe emakhosikazini namakhosikazi ekuthathe ezinganeni.
Hlonipha indalo. Udalwe waba yilesi sizwe oyisona. Ungazenyezi. Kuyicala kuNkulunkulu ukugunda amashiya owawaphiwa, udwebe athandwa nguwe. Kuyicala ukumboza izinwele zakho ngezesinye isizwe osibona singcono kunawe. Uyeka owakunikwa simahla ukhipha imali uthenga ongakwaziyo. Uthi uMdali akacabanganga kahle. Wawudalwe ungokunye manje sewaziguqula, uyedelela, awumhloniphi oNgabonwa.
Hlonipha izitho zomzimba wakho. Zimboze ngendlela efanele. Ungahambi unqunela noma ubani. Isilwane esingenanembeza esihamba nqunu. Nomthakathi ongenabo ubuntu uyakuthanda ukuhambaze. Uma sewuthanda ukukhumula njalo phambi kwabantu ubokwazi ukuthi seyiyaphela inhlonipho, kwanda ubulwane. Hlala kahle. Abesifazane bakufundiswa bebancane ukuhlala. Noma ngabe ugqokise okowesilisa wena ungowesifazane, hlala kahle. Ungasivezeli izinto ezikude. Akubukeki ukuvezwa kwezitho ezifihlwayo. Ziphelelwa isithunzi uma zihlezi obala. Ziveza ukungabi nasimilo. Isimilo udaba olude, olungadinga usuku lwalo.
Hlonipha impahla yomunye. Ungazithatheli. Cela. Okungenani cela ukusiselwa noma ukunanelwa. Funda ukutholisela abalahlekelwe nawe bayokutholisela. Pheza ukuntshontsha. Kumnandi ukudla into oyiphiwe kunokudla ujeqeza ngenxa yokuthi anivumelananga nomnininto. Funda ukuphana yikhona uzokwazi ngokubaluleka kokwabelana. Zifundise ukungebi nangehlo. Zifundise ukweneliswa onako. Ubugovu abubona ubuntu. Ubugovu ukungayihloniphi into yomunye. Igovu yinja.
Hlonipha isigaba nobulili bomunye. Abantu abahlonishwa kakhulu ngabesifazane. Bahlonishwa ngamadoda angempela hhayi amadoda angamanina. Seziziningi kakhulu izishimane namhlanje, yikho kuhlukunyezwa abesifazane. Sakhathala izishimane! Madoda ake nifunde ukweshela. Kumnandi ukuqonywa emva kokweshela. Izishimane azibazi lobu bumnandi. Okungenani ungathola laba abaphuziswa noma ibhodlela likabhiya, sekuyintombi yakho leyo.
UMakhoba umbhali wamaGugu Esizwe. Ikheli lasemoyeni makhobak@ unizulu.ac.za