Izinguquko ezinqala eqenjini iNFP
ZIHLAKAZWE zonke izinhlaka zeNFP kwaqokwa ubuholi obusha besikhashana obuholwa nguMengameli weqembu uNkk Zanele Magwaza-Msibi obuzoyisa inhlangano okhethweni lwangonyaka ozayo.
Lesi sinyathelo simenyezelwe esithangamini nabezindaba eThekwini izolo lapho kuphinde kwethulwa khona isigungu esisha esinamalungu ayisishiyagalolunye.
Lesi sigungu sinezinhlangothi ezimbili ebezingaboni ngasolinye nokuholele ekutheni iqembu ligcine lingakwazanga ukungenela ukhetho lwango-2016.
Iqembu liphinde lamemezela ukuthi livumelane ngokuthi wonke amacala abesenkantolo ahoxiswe.
Lifunda isitatimende, ilungu lalesi sigungu uNkk Happy Khuzwayo lithe: “Awasekho amacala aqhubekayo, azisekho izinhlangothi, yize singeke sigxile engqikithini yamacala kodwa siyajabula ukumemezela ukuthi zombili izinhlangothi zivumelene ngokuthi kubunjwe isigungu sesikhashana samalungu ayisishiyagalolunye esizoholwa uNkk Magwaza-Msibi,”
Uthe lesi sigungu sijutshwe ukuthi sifake iqembu okhethweni lwangonyaka ozayo.
Elinye ilungu lalesi sigungu, uMnuz Emam Munzoor, lithe isigungu sabo sizophinde sisebenze kanzima ukwenza isiqiniseko sokuthi kunobumbano enhlanganweni.
“Lesi sigungu yisona kuphela esinikwe umsebenzi wokubumba nokuvuselela iqembu futhi asingabazi ukuthi sizowenza ngempumelelo umsebenzi ngenxa yamava amalungu aso,” kusho uMunzoor.
Uthe zonke izinhlaka zeqembu kusuka phezulu kuyofika phansi emagatsheni sezizoba nezigungu ezinamalungu ayisishiyagalombili, ezifaka amalungu amane avela ezinhlangothini zombili.
Ebuzwa ukuthi kuzokwenzekani ngabaholi abasePhalamende nasesiShayamthetho, uMunzoor uthe azikho izinguquko ezizoba khona ngoba abantu abasePhalamende nasesiShayamthetho bangamalungu athembekile eqembu.
Uthe iqembu linayo imali yize khona lashayeka ngemuva kokulahlekelwa ngamakhansela angaphezu kuka-200 kulandela ukungalungeneli ukhetho luka2016.
UNkk Sindi MaphumuloMashinini owayefake iqembu enkantolo uthe uzizwa ejabule ngokuthi umdonsiswano usuphelile manje wonke umuntu usezosebenzela ubumbano enhlanganweni.
“Ngijabule, manje osekusele wukuthi sisebenze kanzima sivuselele iqembu siphinde sibuyise nethemba kumalungu ethu amanye abese enokudideka ngokuthi kuqhubekani enhlanganweni,” kusho uNkk Maphumulo-Mashinini naye ongenile esigungwini sesikhashana.