Imibuzo ngokuma kohlelo iKumile
IDA ifuna izimpendulo ngohlelo lwezolimo oluseMandeni okusolwa ukuthi kwaqanjwa amanga kwathiwa lukhona lube lungekho. UDkt Imraan Keeka weDA, utshele Isolezwe ukuthi ngo2016 isiShayamthetho sathola isicelo enhlanganweni yomfelandawonye eseMandeni eyayizoba nohlelo lwezolimo oluzosiza umphakathi. Kwakufanele kulinywe kuphinde kube nemfuyo kulolu hlelo kanti lwaluzobizwa ngeKumile Agricultural Project.
Uthe ngesonto eledlule baye kohlola umsebenzi kulolu hlelo beyikomiti lesiShayamthetho elibizwa ngeQuality of Life kodwa bathola ukuthi alukaze luqale.
“Sasitshelwe ukuthi kunengane okufanele ngabe iyafunda kodwa isebenza kulolu hlelo, satshelwa ukuthi kudingeka ucingo lokubiya, satshelwa nokuthi imfuyo idinga amadlelo nokunye okuningi kule ndawo engama-hectare ayisikhombisa. Sithole ukuthi ayikho iKumile Agricultural Project futhi asibaficanga abasebenzi noma ucingo olubiyile,” kusho uDkt Keeka.
Uthe iKumile Agricultural Project kwakufanele isize umphakathi kodwa akazi ukuthi izosiza bani njengoba ingakaze ibe khona.
“Sifuna ukwazi ukuthi iKumile yaphelelaphi nokuthi kungani ikomiti lakhohliswa kwathiwa ikhona ekubeni ingekho. Sifuna nokwazi ukuthi imali eyayikhishelwe lolu hlelo kwakuyimalini, yangena kwiakhawunti kabani. Siyazifuna zonke lezi zimpendulo eminyangweni ethintekayo okuwuMnyango wezoLimo, owezokuBusa ngokuBambisana nezoMdabu nakuMasipala waseMandeni,” kusho uDkt Keeka.
Uthe bayasiseka isiphakamiso sikaSihlalo wekomiti leQuality of Life, uNkk Vuyela “VV” Tambo sokuthi abasebenzi beminyango ehlukene eyayibhale umbiko ngeKumile Agricultural Project bavele phambi kwaleli komiti.
Ethintwa yiSolezwe uNkk Tambo ubuze ukuthi kungani uDkt Keeka ejahe ukutshela Isolezwe udaba lweKumile Agricultural Project esikhundleni sokuthinta yena?
“Tshelani uDkt Keeka ukuthi angishayele ucingo angazi yini ndaba etshele Isolezwe lolu daba ngoba uyazi ukuthi sizolusebenza,” kusho uNkk Tambo.
Utshele iphephandaba elinguzakwabo weSolezwe, iThe Mercury ukuthi bazoba nomhlangano neminyango ethintekayo ukuze ichaze ngalolu hlelo.
“Umbiko esawuthola uhlukile kunento esiyibonile ngesonto elidlule. IKumile Agricultural Project yinto engekho, yipulazi likamoba nje. Sifuna ukwazi ukuthi yimalini eyatshalwa kulolu hlelo nokuthi kusetshenziswa malini njengamanje. Sifuna nokwazi ukuthi kungani ikomiti lingatshelwanga ukuthi lolu hlelo luphelile nezizathu zokuphela kwalo. Sithole ukuthi alusekho ngesikhathi sesivakashele epulazini,” kusho uNkk Tambo.