UDuduzane uzofakaza kwiKhomishini kaZondo
UDUDUZANE Zuma, indodana yowayengumengameli wezwe uMnuz Jacob Zuma, isivumile ukufakaza kwikhomishini ephenya ngokulawulwa kombuso yidlanzana.
Izolo abameli bakaDuduzane bathe usekulungele ukufakaza ukuze kuzokwanda amathuba okuthi bakwazi ukupheka ngemibuzo abanye babantu asebefakazile kule khomishini.
Lokhu kuvele encwadini efundwe u-Adv Paul Pretorius oyingxenye yabameli bekhomishini.
“Uzimisele ukuzofakaza phambi kwekhomishini ngobufakazi obethulwe nguMnuz Mcebisi Jonas. Sicelwe ukuthi sikudalule lokhu kwikhomishini,” kusho uPretorius.
USihlalo weKhomishini, uJaji Raymond Zondo, uthe kuhle ukuthi uDuduzane usefuna ukwethula ubufakazi futhi lokhu kuzombeka endaweni efanayo nalabo abafuna ukupheka ngemibuzo abanye babantu asebefakazile kwikhomishini.
UJonas owayeyiphini likangqongqoshe wezinali usola umndeni wakwaGupta ngokuzama ukumgwazela ngoR600 million ngo-2016.
UJonas waveza ukuthi uMnuz Ajay Gupta wamtshela ukuthi bahlela ukumenza uNgqongqoshe wezeziMali uma ezosebenzisana nabo.
Ngesikhathi efakaza uJonas, waveza ukuthi kwakukhona nendodana kaZuma emhlanganweni ayenawo nabakwaGupta.
Kunecala elisenkantolo ngezinsolo zenkohlakalo ezibhekiswe kuDuduzane okulindeleke ukuthi lilalelwe ngoJanuwari wonyaka ozayo. UDuduzane ungaphandle ngebheyili kaR100 000.