Kunxuswa izinkampani ukufukula izikole
UNGQONGQOSHE wezokuBusa ngokuBambisana neziNdaba zoMdabu KwaZulu-Natal, uNkk Nomusa Dube-Ncube, unxuse izinkampani ezizimele ukuba zitshale imali kwezemfundo.
UNkk Dube-Ncube ubekhuluma emcimbini obuseStandard Bank eThekwini ngesikhathi ekhombisa ngomnikelo wezigidi wempahla okubalwa kuyo ifenisha nomfaniswano wabafundi okuzohanjiswa ezikoleni ezintulayo ngaphansi koMkhandlu weTheku.
Uthe uhlelo luka-Operation Sukuma Sakhe luyaqhubeka nokuthela izithelo ezinhle.
“Uhulumeni uyazidinga izimboni ezizimele ukuba zifake isandla emikhankasweni yakhe,” kusho uNkk Dube-Ncube.
Uthe kukhulu asebekuzuzile ukuzama ukulungisa amaphutha enzeka ngesikhathi sengcindezelo.
“Umonakalo owenziwa imigomo yobandlululo udinga ukuthi sonke sifake isandla, izinkampani ezizimele akumele zibe yizibukeli kodwa nazo kumele zibambe iqhaza ekulekeleleni ngezinsiza ezidingekayo, sijabula kakhulu ngalokhu okwenziwa iStandard Bank, siyakholwa futhi ukuthi lokhu abakwenzayo kuzokwenza nezinye izinkampani zisike iphethini,” kusho uNkk DubeNcube.
Uthe ezikoleni eziningi othisha nabafundi basasebenzisa izinsiza ezingagculisi okudala ukuthi othisha abaningi bagcine bengafuni ukufundisa kulezo zikole bancamele ukuya emadolobheni.
“Sifuna ukwenza izikole ezisemakhaya nasemalokishini zikhange, sisemkhankasweni wokubuyisa isithunzi sezingane nothisha ezikoleni ezingenazo izinsiza,” kusho uNkk Dube-Ncube.
Uthe abantu kumele bakhumbule ukuthi akumele kuyekelwe kuMnyango wezeMfundo ukuthi uxazulule izinkinga ezikoleni.
“Kuwumsebenzi wethu sonke ukuqinisekisa ukuthi izingane zethu zithola imfundo ekahle ngokwenza isiqiniseko sokuthi izinsiza nengqalasizinda ezikoleni kukhona,” kusho uNkk Dube-Ncube.