Impilo iyigugu kufanele siyinakekele
UTHI bewazi ukuthi ngenxa yesibalo esiphezulu sabantu abanezifo zamahlalakhona (izifo ezingalapheki) uhulumeni waseNingizimu Afrika usebenzisa imali enguR720 million minyaka yonke ukubahlinzeka ngemithi? Bawu-6 million abantu bakuleli abadla imithi yalezi zifo, esingabala kuzo isifo sikashukela, esezinso, esomfutho wegazi ophezulu, umdlavuza, ukuzimuka nezinye.
Kulo 6 million wabantu uhulumeni usebenzisa uR120 ngosuku ukuhlinzeka umuntu ngamunye ngemithi.
Okunye okukhathazayo wukuthi abantu abaningi baqala ukuhlaselwa yilezi zifo ngesikhathi besebancane kakhulu, kusukela eminyakeni yo-40 kuya phezulu.
Akufani nasemazweni athuthukile, lapho abantu beqala ukuphathwa yizifo zamahlalakhona uma sebengaphezu kuka-60.
Njengoba siqala inyanga uSepthemba, okuyinyanga yamagugu, kubalulekile ukuthi singagcini nje ngokugxila kwezamasiko nasemlandweni wezwe, kepha sizikhumbuze nangobugugu bempilo uqobo lwayo.
Isonto lokuqala kuSepthemba sonke emkhakheni wezempilo besiqwashisa ngokubaluleka kwezinso.
Izinso zenza umsebenzi omkhulu kabi egazini. Zihlanza, zikhiphe konke okungadingeki emizimbeni yethu. Kodwa uma uwumuntu omkhulu ngokweqile, aba maningi amathuba okuthi uphathwe yizinso, ungenwe yisifo sikashukela noma esomfutho wegazi ophezulu. Isifo sezinso siyingozi ngoba siwumakhokhoba ocasha isikhathi eside, avele sekukubi, nomonakalo usumningi kakhulu.
Ucwaningo luveza ukuthi balinganiselwa ku-10% abantu abanesifo sezinso ezingalapheki emhlabeni jikelele kanti omunye wemithelela yaso wukuzimuka noma (ukukhuluphala ngokweqile) – nokuyinto engagwenywa ngokuthi abantu bangadli ngokweqile futhi bahlale ngokuzivocavoca.
Kuthiwa njalo ngonyaka eNingizimu Afrika abantu abangu-500 kwabayisigidi baba nenkinga yokuphathwa yizinso okungasalapheki.
Lesi sibalo siphezulu kakhuluikakhulukazi ngoba umonakalo omningi ezinsweni udalwa yithi uqobo, ngokwenza lezi zinto esengizibalile.
Enye yezinkinga ezinyusa umthamo wabantu abagulayo esifundazweni wukwentula ulwazi mayelana nezempilo. Kubalulekile ukuzihlupha ngokuthola ulwazi ngezempilo ukuze ushintshe ukwenza, ugweme izifo kunokuthembela ekwelashweni.
Kubalulekile nokuvakashela emtholampilo noma kanye ngonyaka, uyoxilongwa nje, ngisho uzizwa ungaguli. Ukuziphatha ngendlela efanele nokuthatha izinqumo eziphusile ngezempilo kungakusiza uphile kahle, nakade. Kungasiza nangokuthi yehle ingcindezi kuhulumeni, le mali enguR720 million isetshenziswe kwezinye izidingo zezempilo.
Uma umphakathi uhlome ngolwazi lwezempilo kungaba lula ukuthi uphucule indlela ophila ngayo nezinqumo ozithathayo, ukuze sehle isibalo sabantu abagulayo nabadlula emhlabeni ngokungenasidingo.
Abantu abasengcupheni yokuphathwa isifo sezinso abanesifo sikashukela; umfutho wegazi ophezulu; esenhliziyo; abanomlando wokuzalwa emndenini onalesi sifo; abaphuza utshwala nababhema ugwayi.
Kunemigomo eyisishiyagalombili emqoka edinga ukulandelwa ukuze izinso zakho zihlale ziphilile:
Ungabhemi ugwayi: Ukubhema kwandisa amathuba okuphathwa isifo sezinso ngo-50%;
Phuza amanzi okungenani angangelitha nesigamu ngosuku;
Hlala uphilile ngokuthi uzivocavoce: lokhu kwehlisa ingcindezi egazini bese kwehlisa namathuba okuphathwa yisifo sezinso;
Gcina ushukela emzimbeni wakho usesimeni esifanele: Isigamu sabantu abanesifo sikashukela bagcina sebelimele nezinso.
Kumqoka ukuthi abantu abanesifo sikashukela bahlale njalo ngokohlola ukuthi izinso zabo zisasebenza ngendlela efanele yini;
Ukudla okunempilo nokujwayela ukubheka isisindo sakho kungasiza ukuvikela isifo sikashukela, isifo senhliziyo, nezinye izifo ezingaholela ekuphathweni isifo sezinso;
Akufanele udle ukudla okunosawoti ongaphezu kwamagram awu-5 ngosuku.
Konke lokhu kubalulekile ngoba ukugwema izifo kungcono kunokuzelapha futhi uhlelo lokwenza umsebenzi wezinso ezingasebenzi lwe-dialysis luyabiza, lunezingqinamba futhi aluvulelekile kunoma wubani ngoba lungaba yingozi kubantu abanezifo ezithize.
Kule nyanga yamagugu nangaphesheya kwayo, asiqale sinakekele izinso nempilo yethu jikelele kusenesikhathi. UDkt Sibongiseni Dhlomo uwuNgqongqoshe wezeMpilo