‘Kuyakhathaza ukuzwa ngokubulawa kwabantu’
I-IFP ithi ukwenyuka kwesibalo sokubulawa kwabantu eNingizimu Afrika kwenza ukuthi kube nesidingo sokuthi kuqhubeke inkulumompikiswano mayelana nokubuyiswa kwesigwebo sentambo.
USotswebhu we-IFP ePhalamende, uMnuz Narend Singh, uthe kuyakhathaza ukuzwa uNgqongqoshe wamaPhoyisa, uMnuz Bheki Cele, etshela iPhalamende ukuthi isibalo sokubulawa kwabantu siphezulu wena owabona lapho ibibambene khona.
“Kuthiwa bawu-57 abantu ababulawa njalo ngosuku, 391 ngesonto, 1 564 ngenyanga no-20 336 obulawa ngonyaka. Kulezi zibalo abawu-3 915 ngabantu besifazane nezingane,” kusho uSingh.
Uthe izinga eliphezulu lokubulala lenza bazibuze imibuzo ukuthi amasu nezinhlaka ezisetshenziswayo ngabe ziyakwazi yini ukunqanda ubugebengu.
Obhekele izindaba zamaphoyisa kwiDA ePhalamende, uMnuz Zakhele Mbhele, uthe izibalo zobugebengu zikhombisa ngokusobala ukuthi uhulumeni we-ANC uyahluleka ukuvikela izakhamuzi zezwe.
“Ukuthi uhulumeni we-ANC usebenzisa R9.1 million uvikela ongqongqoshe kodwa usebenzise uR1 500 ukuvikela isakhamuzi esisodwa kukhombisa ukuthi awubakhathalele abantu,” kusho uMbhele.
Ilungu lePhalamende leNFP, uMnuz Emam Munzoor, uthe izibalo zobugebengu eziphumile zikhombisa ukuthi izwe selilawulwa yizigebengu.
“Lezi zibalo zikhombisa ukuthi abantu baseNingizimu Afrika basemseni wezigebegu okuyizo esezilawula imigwaqo, amakhaya nawo wonke amakhona ezwe,” kusho uMunzoor.