Usalila ngendodakazi ‘eyabulawa yisoka layo’
ISAQAQAMBA inhliziyo yomzali okwabulawa indodakazi yakhe nomzukulu yisoka maqede wabagqiba ethuneni elingashoni ngasoThongathi ngoJanuwari nonyaka.
Izolo, njengoba kukhishwe izibalo zobugebengu kuleli, kuvele ukuthi iKwaZulu-Natal ihamba phambili ngezibalo zokubulawa kwabesifazane nezingane.
Bangu-665 abesifazane ababulewe eKZN, kube izingane zamantombazane ezingu-91 nezingane zabafana ezingu-130. Bebonke bangu-886 ababulewe kusukela ngo- 1 Ephreli 2017 kuze kube uMashi 31, 2018. Sekuhlanganiswe zonke izifundazwe abesifazane nezingane ababulewe bangu-3 915.
Kulezi zibalo kukhona nendodakazi kaMnuz Musa Ntuli, uNksz Nelisiwe Ntuli (24) owabulawa nengane yakhe uNolwazi (8). Kuleli cala kusolwa isoka lalo wesifazane uMnuz Bongani Gumede (29) okumanje uhamba icala.
UNtuli uthe zonke izinsuku uyacabanga ukuthi indodakazi yakhe ukube iyaphila ngabe basaphila kahle. “Kubuhlungu ukuzwa ukuthi baningi abesifazane ababulawa lapha eKZN, kubalwe nengane yami lapho. Kusenzima ukuqhubeka nempilo ngoba le ngane iyona ebisondla. Kubuhlungu kakhulu ukuthi abesifazane nezingane baseKZN yibona ababulawa kakhulu kunezinye izifundazwe kuleli ikakhulukazi lapha e-KZN.”
Ngawo uJanuwari nonyaka eSidakeni eMandeni uNksz Ziphi “Zoe” Buthelezi (49) nendodana yakhe uMthunzi (19) babulawa bagqitshwa emgodini osegcekeni lesihlobo sabo esaboshwa sagwetshwa ngaleli cala. Nabo babalwa kulaba ababulewe besifazane nezingane kusukela ngonyaka odlule.
Isishoshovu samalungelo ezingane nabesifazane uNkk Joan van Niekerk izolo utshele Isolezwe ukuthi kumele kuqhamukwe nezindlela zokuvikela abesifazane ezizosebenza.
“Kuyathusa kakhulu ukuthi abesifazane baseKZN basabulawa kangaka. Kuyacaca ukuthi lokhu kumele kusukunyelwe phezulu, kumele siqhamuke nezindlela ezizosebenza zokuvikela izingane zethu nabesifazane. Uma ubheka nje uhlelo lwamaphoyisa lokuvikela abesifazane abasuke behlukumezekile alusebenzi ngoba bashona benazo izincwadi ezibavikela kwabasuke bebahlukumeza ukuba bengasondeli,” kusho uNkk Van Niekerk.
UDkt Rishigen Viranna okhulumela iDA ophikweni lokuphepha komphakathi eKZN uthe lezi zibalo zikhombisa isimo esithusayo ngalesi sifundazwe okubonakala siyisizinda sokubulawa kwabantu futhi esinesibalo esiphezulu sokubulawa kwezingane nabesifazane kuleli.