Luyacotha olokubulawa kosopolitiki
UKHOMISHANA wamaphoyisa kuzwelonke uLt General Khehla Sitole izolo uyivumile induku wathi basalele emuva ekuxazululeni amacala okubulawa kosopolitiki KwaZuluNatal.
USitole usho kanje ngesikhathi bethula izibalo zobugebengu phambi kwekomiti elibhekelele ukusebenza kwamaphoyisa ePhalamende.
“Kumele sivume ukuthi sisalele emuva ekusombululeni amacala okubulawa kosopolitiki KwaZulu-Natal kodwa sinethemba lokuthi uzoba khona umehluko ngemuva kwezinyathelo ezinqala esesizithathile,” kusho uSitole.
Uthe ithimba elibhekelele ukubulawa kosopolitiki seliqinisiwe ngemuva kwezikhalo ngethimba ebelikhona.
NoNgqongqoshe wamaPhoyisa kuleli uMnuz Bheki Cele uke wakhala ngethimba lamaphoyisa ebelijutshwe ukuthi liphenye ngamacala okubulawa kosopolitiki wathi lihuqa ubuthongo okwenza ukuthi ababulali bangabanjwa.
Ukubulawa kosopolitiki KwaZuluNatal kuze kwaphoqa noMengameli uMnuz Cyril Ramaphosa ukuthi abumbe ithimba longqongqoshe bazo zonke izinhlaka zezokuphepha ngenhloso yokuthi zisebenzisane.
Phakathi kosopolitiki ababulewe kusukela ngo-Ephreli ngonyaka odlule kuze kube uMashi kulo nyaka kubalwa, uMnuz Khaya Thobela, obeyisekela likaSihlalo we-ANC eHarry Gwala.
Khona futhi eHarry Gwala ngoSepthemba ngonyaka oludle kubulawe uMnuz Sindiso Magaqa owake waba nguNobhala-jikelele we-ANCYL.
EMkhambathini mabili amakhansela abulawe khona, uMnuz Kwazikwakhe Mkhize owadutshulwa ephuma emhlanganweni weqembu ngo-Agasti ngonyaka odlule noMnuz Lungisani Mnguni owadutshulwa ngesikhathi ehambisa ukudla esikoleni njengoba kuthiwa wayenethenda yokuphakela izingane.