U-Connie Ferguson uzoba yisikhulumi esiqavile kwiDBF Women Economic Empowerment Engagement

I-DURBAN Business Fair (iDBF), ezoba mhla ka 18 kuya kumhla ka24 Septhemba e-Durban ICC naseDurban Exhibition Centre, izogubha iminyaka ewu-20 ngendumezulu yohlelo lwezingqungquthela nezinye izithangami.

Eqhulwini kuzoba yi-Women Economic Empowerment Engagement ngoLwesithathu, mhla ka-20, lapho usaziwayo womlingisi, umdidiyeli nosomabhizinisi u-Connie Ferguson ezoba yisikhulumi esiqavile khona.

Isihloko sohlelo lwamabhizinisi olugxile kubantu besifazane sithi: “She grows. She inspires. She leads.”, okusho ukuthi “uyadlondlobala, uyakhuthaza, uyahola”. Ekhasini lakhe likaFacebook uzichaza njengosomabhizinisi, umlingisi, inxusa lezempilo, umxhumanisi, indodakazi, inkosikazi, umama nesishoshovu sezindaba zabantu besifazane, akubuzwa ukuthi u-Connie ungena khaxa kulo msebenzi. Inkulumo yakhe enohlonze kulindeleke ukuthi ikhuthaze, ivuselele futhi yakhe. Izikhulumi ezakhayo I-Women Economic Empowerment Engagement, eyenzelwe abantu besifazane bodwa, iwuhlelo oluzimele lukaMasipala waseThekwini olwasungulwa eminyakeni ewu11 eyedlule. Njengoba kulo nyaka kugujwa ikhulunyaka lokuzalwa kwesishoshovu nengqwayingqwayi yomzabalazo, u-Albertina Sisulu, ethimbeni le-Women Economic Empowerment Engagement kuzoba khona u-Elinor Sisulu, ongumbhali, isishoshovu samalungelo abantu nomhlaziyi wepolitiki. Iqhaza lakhe lizogxila ekuhlonipheni uMama uSisulu ngegalelo lakhe ekuletheni umbuso wentando yabantu eNingizimu Afrika namangwevu akhe ekulweleni intuthuko yabantu besifazane.

Omunye ozoba sethimbeni lezikhulumi wuLondi Ngcobo, owesifazane osemusha ongenisile emkhakheni okukhonya abantu besilisa kuwo, umkhakha wezasolwandle. ULondi owumlawuli wemikhumbi ngokuqeqeshwa uyidredge master yokuqala yesifazane. Kumqoka ukubekisa indawo Yileli qoqo lezikhulumi elizoba seqhulwini lezinkulumo ezikhuthazayo bese izethameli zithola ithuba lokubuza imibuzo, zibeke nelaka lazo, zithole ithuba lokungqumuza nezikhulumi kulo mcimbi. Lesi sithangami sizoba se-Durban ICC kanti siqala ngehora lesikhombisa ekuseni.

Indlela yokugqoka ithi “Show the queen in you”, okuwukuthi khipha amangwevu okuba ngowesifazane okhethekile.

Yincane indawo kwi-Women Economic Empowerment Engagement, ngakho kumqoka ukubekisa indawo.

Usuku lokugcina lokubekisa indawo wuLwesihlanu, mhla 14 Septhemba.

Ukuzibekisela indawo, shayela ku-031 829 6460 noma uthumele i-email ku: admin@lomes.co.za