Abafundi ababizwa ngamagama omengameli
UMA ungena egcekeni lesikole iNkanyezi Primary, eMbumbulu, uzwa kumenyezwa amagama omengameli abehlukene, abasezikhundleni nasebaphuma kuzo.
Uqale uzitshele ukuthi awuzwanga kahle kanti cha uzwe kahle kulesi sikole kuno-Obama, uRamaphosa noMandela.
UBayanda Shange ofunda uGrade 3, obizwa ngo-Obama, okuyisibongo sowayengumengameli waseMelika uMnuz Barack Obama, uyigosa lengoma, ubuye adlale ibhola lezinyawo. Ekilasini uyaziwa ukuthi akenqeni ukuphikisana nothishanhloko uma efundisa ngendlela ayibona sengathi iyathathela uma kufundwa izibalo.
Kuthiwa uyaphakamisa atshele uthishanhloko ukuthi yena wazi indlela esheshayo futhi izokhipha umphumela ofanayo. Uma engekho uthishanhloko ozakwabo bambiza ngothishanhloko futhi uthishanhloko walesi sikole uMnuz Zakhele Gumede uyazi ngembangi yakhe.
Uthi uhlale emtshela ukuthi yena wazi izindlela ezilula futhi ezinqamulelayo zezibalo.
Usho kanjena nje uGumede kuthiwa uBayanda uyazihlupha ngokuhlale ebuza kwabanye othisha ukuze afike enolwazi olusha.
UDumisani Meyiwa ofunda uGrade 1 waziwa ngoMandela okuyisibongo sowayengumengameli wakuleli wokuqala wentando yabantu uDkt Nelson Mandela. Uthi leli gama waliqanjwa nguyise, akazi ukuthi kungani amqamba ngalo kodwa nasekhaya ubizwa ngalo. Unyaka wakhe wokuqala esesikoleni, othisha abakaboni ukuthi yini ayenza ngokwehlukile.
UMpilo Kweyama ofunda uGrade1, obizwa ngontanga ngokuthi unguRamaphosa, okuyisibongo sikaMengameli wezwe uMnuz Cyril Ramaphosa. Akekho ongazi ukuthi uma wenza okuphambene nomthetho uzokuceba kuthisha. Uthi uyise usanda kumetha leli gama futhi naye uyalithanda.
Ulwazi lwepolitiki kubafundi kungenzeka ukuthi lwenziwa ukuthi isishoshovu sezepolitiki, uMnuz Anton Lembede, okuqanjwe ngaye umgwaqo waseThekwini owawaziwa ngoSmith Street, wafunda kulesi sikole.
UGumede uthe uLembede wafunda uGrade1 kuya kuGrade5 kulesi sikole ngaphambi kokuyofunda eTobi Primary eyayiyiHigher Primary ngalezo zikhathi.
Lesi sikole esasiyisonto lamaRoma, iSt Marumba ngesikhathi sisungulwa ngo-1930, sinabafundi abangu-185, siyisikole sokuqala samabanga aphansi sakule ndawo. Siqala kwaGrade R sigcine kwaGrade 7. Sibuyele ngaphansi kukahulumeni ngo1976.
Kuleli sonto, uNdumiso Mkhize ofunda uGrade 7 ulethe injabulo kubafundi bakulesi sikole, ngesikhathi ewinela isikole ijezi lebhola lezinyawo nelebhola lomnqakiswano lamantombazane emcintiswaneni webhola weSolezwe eliwenza ngokubambisana noCoca Cola Beverages South Africa.
Indaba ebhalwe uNdumiso yiyo edle umhlanganiso. Lo mfundi useqenjini lebhola lesikole.
UGumede uthe abafundi bakulesi sikole bayazifela ngebhola likanobhutshuzwayo nelomnqakiswano, ukugijima nengoma kodwa abakwazi ukuzilolonga esikoleni sabo ngoba ayikho inkundla yezemidlalo.
Umphakathi wanikela ngomhlaba ukuze kwakhiwe inkundla yezemidlalo yesikole kodwa kabanayo imali yokukhokhela ugandaganda ozovula le ndawo.
“Siyayithola imali emnyangweni wezemfundo kodwa inkinga wukuthi iningi labafundi bethu kabanazo izitifiketi zokuzalwa. Umnyango usinika imali yabafundi abanezitifiketi. Lokho kuholela ekutheni nokudla okufikayo kube kuncane. Asikwazi ukubaxosha abafundi abangenazo izitifiketi ngoba banelungelo lokufunda. Ngisaphuma ngingena ngicela usizo lokuthi sithole uMsamariya ongasinikelela ngokudla, ngoba akweneli,” echaza.
Uma kuwusuku lwezemidlalo uthe abafundi bahamba ngezinyawo bayodlala enkundleni yezemidlalo yomphakathi.
“Bafika sebekhathele bangakwazi ukuzilolonga ngendlela. Abazali babafundi abakwazi ukusihlangabeza ngezinto ezishodayo ngoba iningi kalisebenzi liphila ngesibonelelo sikahulumeni,” kusho yena.
Lesi sikole siwuQuintal 2, sithathwa njengesingcono ngoba siseduze kwedolobha iMbumbulu. Asikwazi ukuqasha unogada, othisha bafundisa begade imfuyo, nabantu abeqiwe uphuzo abajwayele ukuphambukela esikoleni.
“Onogada abakhulu yiwo umphakathi owakhele isikole, uma kukhona ongakuboni kahle ufika ngokushesha,” kusho yena.
UMnuz Samkelo Nkosi wakwaCoca Cola Beverages South Africa, uthe abafundi abasesigabeni sabaseNkanyezi badinga ukufunda nokudlala yingakho kubalulekile ukuthi bafake isandla.