Ihhovisi elizocwaninga ngesivuvujikelele
KUTHENJWA ukuthi ihhovisi lokuqala ngqa elizocwaninga ngomthelela wokuguquka kwesimo sezulu ngendlela engajwayelekile kubantu nasemkhathini lizoza nezisombululo enkingeni yesivuvujikelele.
Lokhu kushiwo ngobemele iMeya yeTheku, uMnuz Nkosenhle Madlala, emcimbini wokuvula ngokusemthethweni kwehhovisi, eliseNyuvesi yaKwaZulu-Natal eWestville, eThekwini, izolo.
UMadlala uthe isivuvujikelele yinkinga okufanele isukunyelwe yiwo wonke umuntu futhi uyathemba ukuthi ihhovisi elivuliwe lizoza nezisombululo ezizosiza abantu baseThekwini.
Wenze isibonelo sokuthi iTheku selijwayelwe yizikhukhula ezivamise ukugugula imizi yalabo abakhe ngasosebeni lomfula.
Umphathi wehhovisi, uSolwazi Debra Roberts, ungowesifazane wokuqala emazweni aseNingizimu neNkabazwe ukuhola ithimba lesivuvujikelele eminyakeni ewu-30 selokhu kwasungulwa izinhlelo ezicwaninga ngokuguquka kwesimo sezulu.
UMqondisi Jikelele eMnyangweni wezeMvelo kuzwelonke, uDkt Tsakani Ngomane, uthe ukuvulwa kwehhovisi lesivuvujikelele kuzokwandisa imibono yamazwe ase-Afrika nocwaningo olwenziwa ososayensi bezwekazi.
“Isivuvujikelele akufanele sisibuke njengento ekude nathi ngoba kulimala kakhulu abantu baseAfrika, abahlala eziqhingini nabanye basemazweni angasikhiqizi isisi esilimaza umoya. Kubalulekile ukuba khona kwaleli hhovisi ngoba lizoba sekhaleni locwaningo oluzosiza ukusivikela ezinkingeni ezidalwa yisivuvujikelele. Imiphumela yesivuvujikelele siyibonile eNingizimu Afrika ngesikhathi kunesomiso esibi eWestern Cape,” kusho uDkt Ngomane.
USolwazi Roberts uthe ucwaningo lwabo ngeke lugxile kwisayensi kuphela kodwa bazosebenzisana nemiphakathi ngoba yiyona ethikanyezwa yisivuvujikelele.
“Kule zinyanga eziyisikhombisa esizisebenzile sesigxilise umbono wethu ocwaningweni obelubheka ukuthi kungani isivuvujikelele sinyuka ngo-1.5 C° emhlabeni jikelele. Yithina sodwa esibe nombono wase-Afrika. Sizokwenza nocwaningo olubheka isivuvujikelele olwandle nasemhlabeni,” kusho uSolwazi Roberts.