Zibhekiwe izitswebhu ezisayine sekuyovalwa
UKUBUYA kwemidlalo ye-Absa Premiership ngeke kugcine ngokuqeda inkemane ebihlasele ngenxa yemidlalo yeFifa, kepha kuzonika ithuba lokuzidelisa kubalandeli bamaqembu asayinise izitswebhu zabadlali ngosuku lokugcina lokuvuleka kwewindi lokushintshana ngabadlali.
Abalandeli bamaqembu afana neKaizer Chiefs, Cape Town City neMamelodi Sundowns kufanele ukuthi abasakwazi ukulinda kushaye impelasonto ngoba kunamathuba okuthi babone izinkunzi zabo ezintsha zilihlikihla ezinkundleni ezahlukene.
Uma uzokhumbula ukuthi iSundowns isenomdlali ofana noPhakamani Mahlambi, osayine kuyona ngosuku lokugcina lokuvuleka kwewindi, ngeke kube lula ukugxeka abalandeli beSundowns ngokuhluleka ukulinda. ISundowns ilande uMahlambi kwi-Al Ahly yase-Egypt ngemali eshisiwe ngakho-ke kubhekwe ukuthi uPitso Mosimane uzombophela yini uma sebebhekene naMaZulu ngempelasonto. UMosimane usanda kuveza nokho ukuthi uMahlambi akakabi wumqemane ngokwanele.
Lesi simo sifana ncamashi nakwiChiefs ngoba nakhona kusayine uLebogang Manyama noMario Booysen ngalo lolu suku lokugcina. Uma ubabheka laba badlali bobabili bazodingeka kwiChiefs edonsa kanzima emidlalwnei yeligi ngoba inkinga ayikho ekuyekweni kwamathuba akhiwayo kepha nokuvuza emuva kuyinkinga kwezikaGiovanni Solinas. UManyama ubuya eTurkey kanti uBooysen ubekwi-Ajax Cape Town edliwe yizembe. USolinas uzovakashela uBenni McCarthy eCape Town Stadium kodwa kukuyena ukuthi uyazijabulisa yini izinhliziyo zabalandeli bakhe ngokubophela laba badlali. Kungena elikaBenni nje, naye lo mqeqeshi ofake iCape Town City kowamanqamu weMTN 8 ozodlalelwa eThekwini, ugabe ngesibabuli somgadli wodumo kwiOrlando Pirates nakwiBafana Bafana, uTokelo Rantie. URantie obesehlale isikhathi eside engadlali eqenjini laseTurkey, usayine kwezikaBenni ayegadla naye bedla izicoco kwiBucs.
Kubhekiwe ukuthi uzoqala yini kwiChiefs kodwa uma kuya ngendlela umqeqeshi wakhe akhuluma ngayo ngeke kwethusa uma engaqala lo mdlalo oseKapa.
KwiBidvest Wits ezihola phambili ku-log, uSibusiso Kumalo, osegcogcome amaqembu amaningi kusukela esayine kwiSundowns eminyakeni edlule, uphinde wabolekiswa kwezikaGavin Hunt. UHunt angase amdedele lo mdlali uma sebebhekene neMaritzburg United ngayo belu le mpelasonto. Naye uKumalo ubolekiswe ngosuku lokugcina kuvuleke iwindi lokuhwebelana ngabadlali.