Ubunzima amaphoyisa ephelelwa ngamanzi
ASESIZWA wukucela ukusebenzisa izindlu ezincane komakhelwane amaphoyisa aseNsuze osekunamasonto amabili engenamanzi.
Kuthiwa isiteshi samaphoyisa saseNsuze nenkantolo yemantshi kuphelelwe ngamanzi kusuka ngoLwesihlanu emasontweni amabili edlule.
Umthombo ongaphakathi esiteshini uthe abasebenzi bathwele kanzima selokhu amanzi ephelile ngoba kufanele baye komakhelwane ukuze bazikhulule.
Uthe kusolakala ukuthi amanzi awekho ngoba kuphuke iphampu ephampa amanzi epitsini.
“Siyaye siphume ngamaveni siyokha amanzi edamini. Uma abasebenzi bedinga ukusebenzisa ithoyilethi basheshe bagoduke noma bacele komakhelwane,” kusho umthombo.
Uthe usonkontileka oqokwe nguMnyango wezemiSebenzi yoMphakathi uthe usalinde okokulungisa ukuze aqale ukusebenza.
Umthombo uthe okwamanje bahleli ebumnyameni ngoba abazi ukuthi kungagcina kulungiswe nini.
Umsebenzi wasenkantolo uthe abantu abasuke beze enkantolo nabo baba senkingeni uma bedinga ukusebenzisa izindlu ezincane noma befuna ukuphuza amanzi
“Ukungabibikho kwamanzi kuyinkinga nje ngoba enkantolo kuke kufike nezingane ezincane ezisuke zizofakaza. Kuyinkinga uma zifuna ukuphuza amanzi. Nathi sifika siphethe izipakupaku zo-2 litre kodwa lawo manzi agcina ephelile. Uma abasebenzi bedinga ukusebenzisa ithoyilethi bacela komakhelwane. Kubi kakhulu kithina esisebenza la zonke izinsuku,” kusho umsebenzi.
Uthe izinsuku ezinzima kakhulu uLwesithathu noLwesine lapho okusuke kuthethwa khona amacala.
Ngokusho kwakhe amacala ayahlehliswa, amanye adluliselwe enkantolo yaKwaMaphumulo.
Uthe amanzi alethwe yimoto esiteshini samaphoyisa ngesonto eledlule nakuleli sonto kodwa manje lawo manzi asuke engenele.
Ikhansela lendawo, uMnuz Nathi Maphumulo, lithe batholile ngenkinga yamanzi esiteshini samaphoyisa nasenkantolo. Bayayithumela imoto yamanzi uma iceliwe.
Uthe bathole ukuthi uMnyango wezemiSebenzi yoMphakathi uthembise ukuthi uzoyilungisa inkinga yephampu yamanzi.
Okhulumela amaphoyisa, uCol Thembeka Mbele, ukuqinisekisile ukuthi kufe iphampu.