Isikhalo ngowengozi ongaboshwa
UKHATHAZEKILE owesilisa waseFrance, eMgungundlovu, ngokungaboshwa komshayeli wemoto eyaphaphalaza yangena ethempelini yabhangqa nodonga uyise washona.
Kule ngozi eyenzeke ngo-Agasti 30, kwashona uMnuz Makhosi Buthelezi okuthiwa imoto yambhangqa nezindonga zethempeli lamaSulumane elisemzini wakhe.
Indodana kamufi, uMnuz Sbusiso Mbhele, ithe bakhathazekile ngoba umsolwa owayeshayela imoto akakaze aboshwe ekubeni basola ukuthi wayephuzile.
Echaza ngesigameko uMbhele, uthe uyise wayehleli kuveranda wethempeli, kukhona abanye besilisa ababili ababehleli eduze kothango lomuzi.
“Kwaqhamuka imoto igijima ishayelwa owesilisa kukhona nabesifazane ababili phakathi. Ubaba wabona indlela eyayigijima ngayo, wamemeza laba abanye abafowethu ethi ababaleke. Imoto yaqale yashayisa uthango kwalimala abafowethu ababili abebehleli othangweni. Yaphaphalaza yayoshayisa ubaba yamhlanganisa nodonga,” echaza.
Uthe abesilisa ababili okungoMnuz Ntobeko Zuma noZipho (isibongo sakhe esingatholakalanga), baphuthunyiswa esibhedlela. Uveze ukuthi nomufi wayiswa esibhedlela kodwa odokotela bathola ukuthi wasuka endaweni yengozi eseshonile.
UMbhele uthe basola ukuthi umshayeli wemoto wayengeyedwa. Kuthiwa imoto wayeyithenge ngayizolo, ebhiyoza ngayo, ejabulela ukuyithenga.
“Amaphoyisa afika kodwa angamthatha umshayeli futhi angamhlola nokuthi akaphuzile yini. Umshayeli wahuzuka kancane nje engalweni, ayehamba nabo baphuma babaleka. Kuthe noma silandela esiteshini samaphoyisa emuva kwezinsuku ezintathu sathola ukuthi amaphoyisa abengakasenzi isitatimende futhi umsolwa akaboshwanga. Ubaba samngcwaba ngakusasa silandela inkolo yakhe yamaSulumane,” kuchaza uMbhele.
Uveze ukuthi laba abalimala basanda kuphuma esibhedlela kodwa omunye usalokhu ebonana nodokotela ngendlela alimala kakhulu ngayo.
Kuthiwa umshayeli wake wafika emndenini kamufi ephelezelwa ngabathize exolisa ngomonakalo awenzile.
Imizamo yokuthola umshayeli wemoto eyenza ingozi ayiphumelelanga.
Okhulumela amaphoyisa KwaZulu-Natal uColonel Thembela Mbele, uthe kuphenywa icala lokubulala ngokungenhloso elivulwe esiteshini samaphoyisa eThornville. Uthe imoto yaphaphalaza yashaya udonga, kwashona owesilisa oneminyaka engu-46.
“Umufi wayiswa esibhedlela kwatholakala ukuthi ubeseshonile. Ayikaziwa eminye imininingwane mayelana nalesi sigameko kodwa uphenyo luyaqhubeka,” kusho uColonel Mbele.