Sinxusa ukuziphatha kubalandeli: AmaZulu
AMAZULU FC anxuse abalandeli bawo ukuthi baziphathe kahle uma esebhekene neMamelodi Sundowns ngemuva kokuthi ehlawuliswe imali engaphezu kwengxenye yesigidi.
Ikomidi eliqondisa ubugwegwe lePremier Soccer League (PSL) lihlawulise Usuthu uR640 000, lalilengisela uR320 000 izinyanga eziwu-24.
“AmaZulu ayebekwe icala lokuziphatha budlabha kwabalandeli nokuhluleka wukuqinisa ezokuphepha ngesikhathi edlala neMamelodi Sundowns ngoMashi 2 eKing Zwelithini Stadium.
“Umdlalo wamiswa imizuzu embalwa ngemuva kokuthi abalandeli bajikijele enkundleni. Amacala okudayisa amathikithi adlulile esibalweni nelokungaqinisi ezokuphepha awathethile AmaZulu,” kusho isitatimende.
NgeSonto AmaZulu azokwamukela yona iSundowns emdlalweni we-Absa Premiership eKing Zwelithini Stadium, eMlaza, ngo-3 ntambama.
Okhulumela iqembu, uBrilliant Mkhathini, uthe: “Ukuziphatha kwabalandeli yinselelo ekhona yonke indawo. Siyabancenga abalandeli ukuthi bahloniphe izinqumo zikanompempe.
“Siyacela futhi ukuthi baphume ngobuningi beze emdlalweni bayokhuthaza abadlali.
“Eyonondweba ayikho ezandleni zethu ngakho siyacela ukuthi baziphathe kahle noma ngabe kwenzekani.”
Uthe sebeke bahlangana nabalandeli babo bakhuluma ngokuziphatha.
“Sibuhlungu isigwebo esisitholile kodwa-ke okwethu wukuthi singene enkundleni sidlale ibhola. Siyiqembu kasihambisani nodlame,” kusho uMkhathini.
Imenenja yaMaZulu, uQedi Dlamini, naye ukhuthaze abalandeli ukuthi bayogcwalisa inkundla.
“Sidayisa amathikithi awu14 000. Emdlalweni wangesizini edlule bangaphezulu kuka-12 900 abalandeli abafika enkundleni futhi akusilona iqiniso ukuthi sadayisa isibalo samathikithi esingaphezulu. Namanje senza isiqiniseko zonke ezokuphepha zizohamba kahle,” kusho uDlamini.
AmaZulu eza kulo mdlalo ephuma endukwini ayithole kwiBidvest Wits kodlule weligi kanti abengakahlulwa kule nkundla emidlalweni emibili yeligi.
Kulowa mdlalo owawususa umsindo Usuthu lwahlulwa ngo 3-1.