Othisha ababikwe kothishanhloko: Cosas
INHLANGANO yabafundi iCosas isinxuse abafundi ukuthi babike othisha abanenkinga nabo kothishanhloko noma eMnyangweni wezeMfundo, bangaphathi izikhali ezikoleni.
ICosas isho lokhu nje kulandela isehlakalo esenzeke eZeerust, eNorth West, ngeledlule lapho umfundi egwaze wabulala uthisha uMnuz Gadimang Daniel Mokolobate (24).
Ilungu lesigungu esiphezulu sale nhlangano uNkululeko Khumalo usigxekile lesi senzo wathi izikole akuyona indawo yezixhwanguxhwangu.
Uthe bazohlangana namhlanje bayixoxe le ndaba kanjalo nezinye zabafundi abaphatha izikhali.
“Uma umfundi enenkinga nothisha akambike, abangashaywa othisha. Izikole yindawo okungamele kuphathwe kuyona izikhali ngakho ababoshwe abaphatha izikhali. Sidlulisa amazwi enduduzo emndenini kathisha,” kusho uKhumalo.
Izinyunyana zothisha zithi othisha sebeyasaba manje kulandela nemibiko yokuthi kunezibhamu ezitholakale kwezinye izikole eGauteng.
UMengameli weNatu, uMnuz Allen Thompson, uthe kumele isukunyelwe ngokushesha le ndaba ngoba othisha nabafundi bazoqhubeka balimale ezikoleni.
Uthe amaphoyisa kumele azulazule ezikoleni njalo ekuseni nantambama ukuze abafundi nothisha baphephe.
“Kumele kube nonogada abaqeqeshiwe abazoqashwa ngumnyango. Unogada oyedwa kumele agade abafundi abangu-300, ababili abangu-600.”
Okhulumela iSadtu, uNksz Nomusa Cembi, usigxekile lesi sehlakalo wathi kumele kuthathelwe izinyathelo ezinqala umfundi owenze lokhu.
UNgqongqoshe weMfundo eyisSekelo, uNkk Angie Motshekga, uthe ngeke bazibekezelele izehlakalo ezifuze lezi njengoba naseGauteng umfundi wakhomba uthisha ngesibhamu.
“Sizosebenzisana namaphoyisa ukulwa nalezi zehlakalo ezikoleni.”