Luyaqala kusasa ushikishi lwe-Durban Business Fair
LIKHULU isasasa ngosuku lokuqala kwe-Durban Business Fair (i-DBF) kusasa. Kulo nyaka i-DBF ihlanganisa iminyaka ewu-20 yaba khona, kanti ukugubha lo mkhosi, iTheku lihlele uhlelo oluhlabahlosile lwesonto lonke oluzobeka eqhulwini intuthuko yosomabhizini abancane nokuhlomisa abantu abasha.
Phakathi kwamazwibela kuzoba ne-Techzone nezithangami zokucija amaciko.
Ohlelweni lwemibukiso ye-DB, yiTechzone okungafanele ibaphuthele abantu abasha nosomabhizinisi abancane abafisa ukudlondlobala emkhakheni wezobuchwepheshe. Uhlelo lwe-Techzone, olumahhala, luzogaba ngezinkundla zokucija, izigcawu zamarobhothi, ukukhombisa bukhoma, izigcawu zengxoxo nomjaho ozoba wumncintiswano wokwenza ama-app omakhalekhukhwini namakhompyutha ne-Schools’ Innovation Challenge.
Kulo nyaka kwi-DBF kuzoba nezithangami ezimbili zokucijwa kwamaciko. Isithangami sokuthwebula amafilimu nemidlalo yethelevishin sizoba mhla ka-22 Septhemba kanti kuso kuzobe kukhona umlingisi nomqondisi uLeleti Khumalo ozobe eyisikhulumi. Ohlelweni kuzodingidwa amasu okufuna indawo yokushuthela, ukuthola izibukeli nokubhala izindaba zase-Afrika. Kuzolandela ingxoxo yethimba ngesihloko esithi “Sustaining your craft and staying relevant in the industry”, ezoholwa wuThembi Nyandeni odume ngelikaMkabayi kwiSibaya noSihle Ndaba we-The Herd.
Isithangami sokwenza umculo sizoba nezihloko nezikhulumi ezihlukene. Phakathi kwazo kuzoba khona lezi ezilandelayo: • Imboni yomculo yaseNingizimu Afrika – yini edayisayo, ukudayiswa komculo, ubuchwepheshe, izinselelo namathuba akhona; • In conversation with Lindelani Mkhize – pioneering the music industry; • Inspirational story and performance by Nelisiwe Sibiya (ocula ezingomeni ze-Lockdown) ezochaza ngamandla ezinkundla zokuxhumana ekuzikhangiseni nokukhangisa umsebenzi wakho; • Hidden stories encoded in music – mastering your craft and becoming relevant by Mbuso Khoza.
I-DBF izoba se-Durban ICC nase-Durban Exhibition Centre kusukela mhla ka-18 kuya mhla ka-24 Septhemba.