‘Sicela abantu bavikele ubufakazi’
SEKUNXUSWE umphakathi ukuthi uqaphele ukuthi awuphazamisi ukuqoqwa kobufakazi obungasiza amaphoyisa uma ephenya amacala.
Umphathi wophiko lwakwaForensic Services, ngaphansi kweCriminal Record and Crime Scene Management KwaZulu-Natal, uBrigadier Nduduzo Bhengu, uthe abantu bavame ukuphazamisa ukuqoqwa kobufakazi obusuke budingeka uma kuphenywa amacala bebe bengazi ukuthi benza lokhu.
Uthe kuningi okwenziwa abantu okuphazamisa ukuqoqwa kobufakazi.
“Uma isigebengu sizokwenza ubugebengu siyakuhlela lokho ngakho uma sekufika abantu abaningi lapho okwenzeke khona isigameko kugcina sekuphazamiseke ubufakazi. Kunobufakazi balapho isigebengu esisuke sihambe khona, kube ubufakazi bolibofuzo (DNA) nokunye. Abantu uma sebenyakazisa kakhulu kuleyo ndawo (okwenzeke kuyo isigameko), mhlawumbe basuse amaphepha, bethinta emagilasini noma bethinta izinto abangazi ukuthi zifike kanjani, lokho kubulala ubufakazi okungaba obamanyela noma yini engaxhumanisa isigebengu nesigameko,” kuchaza uBhengu.
Uthe lokhu kwenza ukuthi bungabe busaqoqeka ngendlela efanele ubufakazi wathi ubufakazi obuphasa enkantolo ubufakazi obunesigqi.
Uchaze ukuthi ubufakazi bolibofuzo nobamanyela ngeke ukwazi ukubuphikisa futhi awubakhi uma sebucishekile.
Uqhube wathi ngabantu okufanele bavikele ubufakazi uma kwenzeke isigameko.
“Siwumphakathi kufanele sicabange ukuthi icala elenzekile kusafanele lifike enkantolo. Siyacela umphakathi uvikele indawo yesigameko njengokufaka intambo lapho kwenzeke khona lokho okwenzekile ukuze kungangeni noma ubani khona. Umphakathi unawo amandla okwenza lokhu ukuze amaphoyisa afike kusekhona bonke ubufakazi,” kusho uBhengu.
Uthe kubalulekile nokuthi umuntu asho uma kukhona lapho esethinte khona ukuze obakhe ubufakazi bezintupha nokunye kubekwe eceleni. Ngaphandle kwalokhu uthe kufanele abantu bangalihlanzi igazi endaweni yesigameko kuze kufike bona basho ukuthi sebengakwenza lokhu. Uthe bayabasiza nabantu ukuthi bahlanze indawo yesehlo esithile. Uthe kuyingozi ukuthinta igazi ngoba ungagcina usutheleleka nangezifo ezithile wathi yingakho nabo begqoka izembatho ezibavikelayo uma benza lo msebenzi. Uthe abantu bangamumboza obulewe bese befaka intambo ukuvikela indawo.
Wexwayise nabesifazane abasuke bedlwenguliwe ukuthi bangajahi ukugeza umzimba uma bedlwenguliwe ngoba kufanele kube nobufakazi obususwa kubona obungasiza ekutheni kuboshwe umuntu odlwengulile. Uthe okunye abangakwenza abasuke bedlwenguliwe ukuthi basule ngokwangaphansi ukuze kuqoqeke ubufakazi bolibo fuzo.
“Cabanga kabili ukuthi yini ebalulekile kuwena phakathi kokucisha ubufakazi noma usize ekutheni kutholakale okungacindezela lo muntu osuke edlwengulile. Cabanga ukuthi kubaluleke kangakanani ukuthi kutholakale bonke ubufakazi obungasisiza ukuthi siphumelele ophenyweni lwethu,” kusho uBhengu.
Uthe banezinhlelo abazenzayo zokuqwashisa umphakathi ngokubaluleka kokugcina ubufakazi buphephile ukuze liphenywe ngendlela icala. Uthe noma ubani angabathinta uma efuna ukucaciseleka ngokuqoqwa kobufakazi.