Sigadwe amaphoyisa isitshudeni ‘esibulele’
SIQASHWE ngamaphoyisa esibhedlela isitshudeni (25) saseNyuvesi yaseZululand okuthiwa sigwaze uzakwabo (20) ebesihlala naye ngeSonto.
UColonel Thembeka Mbele wamaphoyisa KwaZulu-Natal uthe isitshudeni sibekwe icala lokubulala. Sizoqhubeka siqashwe ngamaphoyisa esibhedlela kuze kube siyalulama.
“Isitshudeni esisolwa ngokubulala esinye eZululand silimele kanzima kodwa siqashwe ngamaphoyisa ngoba sibhekene necala lokubulala. Isitshudeni esisigwazile besinenxeba entanyeni. Sishonele endaweni ehlala abafundi eNyuvesi yaseZululand,” kusho uColonel Mbele.
Izolo abaphathi beNyuvesi yaseZululand bazwakalise ukukhathazeka ngokufa kwezitshudeni zabo ngempelasonto. Baveze ukuthi esokuqala sishone ngoMgqibelo engozini yemoto eyenzeke eRichards Bay. Esesibili sashona ngeSonto emuva kokugwazwa wuzakwabo. Esitatimendeni esithunyelelwe abezindaba abeNyuvesi bathe akucaci ukuthi izitshudeni zibangeni kodwa kuvela ukuthi kuye kwaba nokuhilizisana okuholele ekugwazweni kwalesi esishonile. Abaphathi benyuvesi bacele izitshudeni ukuthi zingaxazululi izinkinga ngodlame bacela nababone ukuhlizisana ukuthi baye esikhungweni esiluleka ngokwengqondo.
Bathe kuzoba nophenyo ngesehlo. “Sidlulisa ukuzwelana nomndeni nabangani bomfundi oshonile. Sicela zonke izinhlaka ezithintekayo zidedele amaphoyisa enze uphenyo,” kusho abaphathi.
Namhlanje kulindeleke ukuthi uNgqongqoshe wamaphoyisa, uMnuz Bheki Cele, ahambele eNyuvesi yaseZululand ukuyokhuza umhlola.
I-ANC izwakalise ukukhathazeka ngokufa kwezitshudeni ezikhungweni zemfundo ePhakeme KwaZuluNatal. Ithi zithathu ezibulawe ngesihluku ngempelasonto.
Iveze ukuthi ngoLwesihlanu kugwazwe uMnuz Nqobani Dlomo obeyilungu le-ANCYL ogwazwe ngesinye isitshudeni endaweni abahlala kuyo eseWestville, eNyuvesi yaKwaZulu-Natal.
Ngawo uLwesihlanu kudutshulwe isitshudeni saseDurban University of Technology (DUT), uSikhumbuzo Shakes Lushaba, eduze kwendawo yokuhlala abafundi ese-Albert Park. ULushaba ubeyilungu le-ANCYL, YCL neSasco eDUT.
“Sikhathazekile ngokwanda kodlame ezikhungweni zethu zemfundo ephakeme. Sisaqoqa imininingwane ngokwenzeke eNyuvesi yaseZululand futhi amalungu ethu aseMusa Dladla axoxa nezinhlaka ezithintekayo. Sicela uphiko olubhekelele ukubuyiswa kobuntu nesimilo oluphethwe wuNdunankulu uMnuz Willies Mchunu noMbhishobhi Rubin Phillip ukuthi lulusukumele lolu daba lodlame ezikhungweni zemfundo ephakeme,” kusho uNkk Nomagugu Simelane-Zulu okhulumela i-ANC KwaZuluNatal.
Uphinde wacela amaphoyisa nazo zonke izinhlaka zemfundo ephakeme ukuthi zize nezisombululo zokunyusa ezokuphepha kwezemfundo.