Sekuqoqwe inqwaba kadoti kuhlanzwa imifula namabhishi
UMKHANKASO wokuhlanza amabhishi nemifula yakuleli uholele ekuqoqweni kwenqwaba kadoti ezindaweni ezahlukene.
Lo mkhankaso owenziwa ngokubambisana nomphakathi owesekwe ngabakwaCoca-Cola Beverages SA sewuholele ekutheni kuqoqwe amapulasitiki kadoti angu-1994.
Lokhu kwenziwe ngothisha, abafundi nabasebenzi bakwaCocaCola Beverages SA abangaphezu kuka-880 .
Umkhankaso owenziwa iNingizimu Afrika yonkana kule nyanga sewuhambe waze wafika eMamelodi, eThekwini naseMuizenberg nezinye izindawo.
Lokhu bekuyingxenye yemikhankaso egxile ekukhuthazeni abantu ukuthi bagcine elakuleli lihlanzekile, iPlastics SA for Cleanup neRecycle Week ephakathi kukaSepthemba 10 no-15 ne-International Coastal Clean up Day engoSepthemba 15.
Ekuqaleni kwalo nyaka abale nkampani yeziphuzo baveze ukuthi banesifiso sokuthi kushaye u-2030 sebeqoqe udoti olingene wonke amabhodlela namakani abawadayisayo emhlabeni wonke njengengxenye yohlelo lwabo olwaziwa ngeWorld Without Waste.
Ngaphandle kwalokhu bafisa ukwenza amabhodlela asetshenziswe kabusha noma esekade esebenzile.
Nyakenye iPlastics SA yenze imikhankaso engu-400 kulo lonke elakuleli ngesikhathi semikhankaso yeRecycle Week neClean-up isebenzisana namavolontiya angu-1600.
Ukusebenzisana kwabakwaCoca-Cola nabakwaGlobal Citizen kwalo nyaka kuzoholela ekutheni bawine amathikithi eGlobal Citizen Festival Mandela 100 labo abayingxenye yemikhankaso.
Uma bewina bangazithola beyobuka abaculi abangosaziwayo okubalwa kubo uBeyonce, Jay-Z, Cassper Nyovest nabanye abazobe beyingxenye yale khonsathi ngoDisemba 2 nonyaka.
Noma ubani oneminyaka engaphezu kuka-18 obhalisela ukuba yingxenye yemikhankaso kusuka ngoSepthemba 14 angazithola esesethubeni lokuwina lawa mathikithi.