Isiqokiwe ezohlela umcimbi Ugu Jazz
UMASIPALA wesifunda Ugu usuyiqokile inkampani ezohlela umcimbi Ugu Jazz Festival kusukela ngonyaka ozayo.
Inkampani ezohlela umcimbi kusukela ngo-2019 kuze kube wu-2021 yi-Eyadini Lounge, kaJabulani “Mjey” Zama ongumnikazi wendawo yobumnandi enegama elifanayo eseMlaza.
Ukuqokwa kwenkampani kaMjey kulandela ukungavuselelwa kwenkontileka yeCyassound Holdings kaSiyabonga Msomi, ebisihlele umcimbi iminyaka eyisikhombisa.
Kube nesidididi kulo nyaka njengoba ingaqokwanga inkampani entsha ngaphambi komcimbi kwaze kwaholela ekutheni ungabi khona njengenhlalayenza.
Okhulumela umasipala, uFrance Zama, uthe uhlelo lokuqokwa kwenkampani baluphothule ngoMsombuluko. Ngokwe-website yomkhandlu bekufakwe isikhangiso sokuthi i-Eyadini Lounge ezokwenza umcimbi, abanezikhalo ngokuqokwa kwayo abeze ngaphambili.
“Umthetho uthi kumele sifake isikhangiso izinsuku ezingu-14. Lezo zinsuku seziphelile. Zibe khona izikhalo kodwa ziphothuliwe. Inkampani ethole ithenda inikezwe umsebenzi ngoLwesihlanu sasayina izolo (ngoMsombuluko),” kusho uZama.
Uthe kungekudala bazozimemezela zonke izinhlelo zabo futhi inkampani ezokwenza umsebenzi izibophezele ukuthi izowenza ngendlela. UZama akadalulanga ukuthi inkontileka ngeyamalini.
“Umcimbi we-jazz uzikhokhela wona. Sikhipha umsebenzi sasho ukuthi sifuna inkampani ezozitholela imali yokwenza umcimbi. Inkampani kumele yenze isiqiniseko sokuthi i-jazz iyenzeka,” kuchaza uZama.
Uphinde waxolisa kubathandi be-jazz ngokuthi ingabi khona kulo nyaka.
“Sazikhipha izitatimende sixolisa kodwa sisaxolisa kubathandi boGu Jazz Festival. Ngonyaka ozayo sizowenza umcimbi ube mkhulu kakhulu. Lo mcimbi ukwethandwa ngabantu basesifundeni sethu, abasesifundazweni nabaseNingizimu Afrika yonke. Inkampani ezokwenza umcimbi isithembisile ukuthi izokwenza indumezulu,” kusho uZama.
UMsomi waziqalela owakhe umcimbi kulo nyaka obizwa ngoGu Jazz Arts Festival oba sendaweni efanayo noGu Jazz Festival okuyisezinkundleni zemidlalo Ugu Sports & Leisure Centre.
UMsomi uthe bayamhalalisela uMjey futhi bazomeseka uma edinga usizo.