Upike isimame sezobumnandi edilini lakhe lalo nyaka uLady D
UZODLISA ngezintokazi ezingenisile emkhakheni wobumnandi kulo nyaka umcimbi wesibili owenziwa umsakazi woKhozi FM, uDudu “Lady D” Khoza. Lo mcimbi owaziwa ngeDinner with Dudu, uzoba nesiqubulo esithi, Let’s go Glitz and Glam, uzoba seCoastlands Hotel, eMhlanga, ngo-Okthoba 11. Ekhuluma neSolezwe uDudu uthe, kulo nyaka ukhethe izintokazi ezisebumnandini ukuthi zibe yingxenye yalo mcimbi, zikhulume ngezimo ezahlukene ezisebenza ngaphansi kwazo nezibe yisifundo ezimpilweni zazo. “Kulo nyaka sibone ukuthi sibe nabesifazane abasemikhakheni ehlukene kodwa endimeni yobumnandi. Kungakho sinesihambeli esifana noMinenhle “Minnie” Dlamini, ozokhuluma ngezinto ezihlukene kulo mkhakha akuwo, aphinde anikeze ngolwazi oluhlukene. Omunye, ngu-Ayanda Ncwane, naye okuyona le ndima kodwa ogxile emabhizinisini. NoBaby Cele ongumlingisi futhi onolwazi oluningi kulo mkhakha, uzokhuluma ngamathuba ahlukene kuwo,” kusho uDudu. Uthe nasemkhakheni wezimali kukhona intokazi, ezonika amacebo lapha nalaphaya, uSindi Mabaso Koyana. Uthe ubumnandi buzobe bubuzwa kulo mcimbi njengoba uKholeka, ezodumisa ngezingoma zakhe. “Abesifazane abasebancane abenza kahle emculweni, nabo ngeke sibashiye ngaphandle njengoba uTipcee, DJ Happygal noZanda Zakuza bezonandisa kulo mcimbi,” kuchaza yena. Uthe amathikithi omcimbi asekhona, kodwa okwenzekayo wukuthi abesifazane bathenga itafula lonke okuyinto abaqale ukuyenza kulo nyaka. Abanye abazobe bekhona kulo mcimbi nguLinda Bukhosini, ongumphathi wePlayhouse noThembi Mtshali ongumlingisi.