Sekugunyaziwe ukubhenywa kwensangu emakhaya
KUZOPHELA ukucashela amaphoyisa kwababhema insangu nabayilimile emakhaya njengoba inkantolo enkulu ezweni ikugunyazile ukuthi ibhenywe iphinde ilinywe emakhaya uma uzozisebenzisela yona hhayi ukuyidayisa.
Kodwa abazoyibhema esidlangalaleni noma batholakale nayo iningi bazoboshwa.
Sithakaselwe yiningi isinqumo senkantolo yomthethosisekelo esikhishwe yiPhini likaMengameli wamajaji, uRaymond Zondo njengoba enqume ukuthi ingabhenywa kodwa hhayi yizingane noma phambi kwazo.
UZondo unqume ukuthi iPhalamende kumele kube yilona elizonquma ngenani lomthunzi wezinkukhu umuntu angawuphatha.
“IPhalamende yilona elizonquma ukuthi lingakanani inani lensangu okumele iphathwe ngumuntu, nangalilima noma angazisebenzisela lona. Inkantolo ayikwazi ukunquma ukuthi lingakanani inani okumele umuntu aliphathe ukuze azisebenzisele lona,” kusho uZondo.
Uthe iphoyisa lizokwazi ukuthi ingakanani insangu umuntu omdala okumele atholakale eyiphethe.
Uthe iPhalamende kumele lilungise isigatshana esithile emthethweni okhona walinika izinyanga ezingu-24 ukwenza lokhu.
Isinqumo sikaZondo sisho ukuthi isigatshana u-4(b) no-5(b) somthetho iDrugs Act nesigatshana u-22A(9)(a)(i) weMedicines Act uthathwa njengento engekho.
UZondo uthe noma sekugunyaziwe ukuthi ibhenywe emakhaya kodwa lokhu akumele kwenziwe phambi kwezingane ngoba akuvumelekile.
Mayelana nokumele kwenziwe amaphoyisa uma ekubambe nensangu, uthe umbuso kumele kube yiwo ozoveza ukuthi obeyiphethe ubefuna ukuyidayisa noma azisebenzisele yona.
UZondo uyalele ukuthi uNgqongqoshe wezobuLungiswa nokuThuthukiswa koMthethosisekelo u-Adv Michael Masutha kumele akhokhe izindleko zabafaka icala oMnuz Gareth Prince, Jeremy David Acton, Ras Menelek Barend Wentzel noNksz Caro Leona Hennegin.
UMasutha neminye iminyango kahulumeni babephikisana nokuthi insangu ibhenywe emakhaya.
Okhulumela iPhalamende uMnuz Moloto Mothapo, uthe lesi sinqumo sale nkantolo sisho ukuthi kumele kwakhiwe umthethosivivinywa omusha noma izinhlaka zikahulumeni ebeziyingxenye yaleli cala zifake lo mthethosivivinywa omusha.
Uthe izinhlaka ezifanele ePhalamende zizonquma ngokuzokwenzeka wathi njengoba kugunyaza umthethosisekelo umphakathi uzoba nezwi ngazo zonke izinto ezizokwenzeka ePhalamende.
Kulesi sinqumo kubalwe namanye amazwe afana ne-Uruguay, Jamaica, Portugal namanye agunyaze ukusetshenziswa kwensangu.