Kushone oyedwa itekisi ishayisa abebewela
KUSHONE owesifazane oneminyaka engu-60 obehamba ngezinyawo omunye walimala kanzima ngesikhathi beshayiswa yitekisi eDurban Station izolo ekuseni.
Kuthiwa umshayeli wetekisi yaseNanda ebidlula akamanga erobhothini, washayisa laba besifazane abewela kuleli robhothi.
Okhulumela amaphoyisa kulesi sifundazwe, uLt Col Thulani Zwane, uthe kuvulwe icala lokubulala ngokungenhloso nelokushayela budedengu eliphenywa ngamaphoyisa aseDurban Central.
Owesifazane oshonile ohlonzwe njengoNkk Sibongile Dladla (60) waseNanda, olimele ulinganiselwa eminyakeni engu-40 igama lakhe kalaziwa futhi akwaziwa ukuthi ngowakuphi.
UNkk Sibusisiwe Thabethe kasoseshini waseNanda, uthe bazwile ngalesi sehlakalo.
“Okwamanje asikabi nayo imininingwane ephelele ngale ngozi, kodwa siyacela amaphoyisa kamasipala ake ayibhekisisi indaba yaleli robhothi ngoba kunokungabekezelelani.
“Amabhasi, amatekisi abanga abagibeli, ngakolunye uhlangothi abahamba ngezinyawo nabo bayeqa khona lapho. Ukuvula nokuvala kwerobhothi kule ndawo akunakwa,” kusho yena.
“Kusiphatha kabi ukuthi kube nengozi edlula nomphefumulo ekubeni sisabheke esikhathini esimatasa samaholidi. Besisathi silungiselela ukuba nomkhuleko wazo izingozi ngenyanga ezayo ukuze sikwazi ukusebenza kahle ngalesi sikhathi. Siyadumala uma sewendulelwa yingozi.” kusho yena.