‘Ababoshwe abashaya isitshudeni kwi-video’
UNGQONGQOSHE wamaPhoyisa, uMnuz Bheki Cele, uyalele amaphoyisa ukuba abheke zonke izitshudeni zaseNyuvesi yasZululand ezivela kwi-video zishaya osolwa ngokubulala ukuze ziboshelwe icala lokushaya.
Izolo uCele ukhwele wadilika ezitshudenini eziziphindiselelayo uma kukhona okwenzekayo enyuvesi yazo wathi lezo ezenze njalo zizobhekana nolaka lwamaphoyisa.
Izitshudeni zivele zamhhewula uCele, zachitha izandla zikhombisa ukungahambisani nokuthi kungenzeka ababonakala kwi-video bebhekane nengalo yomthetho.
UCele uvakashele oNgoye, eMpangeni, eyohlangana nezikhulu zenyuvesi, izitshudeni, abone nalapho kubulewe khona isitshudeni, uSazi Ngubo (20), ngeSonto obenza izifundo zobuthishela, kuwunyaka wakhe wokuqala.
Isitshudeni (20) esisolwa ngokumbulala besihlala nomufi endlini, senza izifundo ze-Information Science. Naso bekungunyaka waso wokuqala.
Kuthiwa izitshudeni zikhande umsolwa ngamatshe emuva kokuba uNgubo egwaziwe.
“Sengiyalele amaphoyisa ukuba abhekisise i-video ehlasimulisa umzimba okushaywa kuyo umsolwa. Azobheke zonke izitshudeni ezivela kuyo ukuze zizobhekana nomthetho. Anginandaba ukuthi nithini kodwa lokho kuzokwenzeka, amaphoyisa kumele enze umsebenzi wawo,” kusho uCele.
Ukugxekile ukubulawa kwesitshudeni nokuphuzwa kotshwala ezikhungweni zemfundo ephakeme.
“Ukuphuzwa kotshwala kuhlezi kuyinkinga ezikhungweni zemfundo ephakeme, nalapha ngiyabugxeka utshwala. Ngike ngezwa ukuthi nina nike nafuna indawo yenu yokuthenga utshwala, ngeke ngingene-ke kakhulu kulokho ngoba yinto yabaphathi besikhungo kodwa engikushoyo wukuthi utshwala buyinkinga. Okusemqoka wukuthi nazi ukuthi nikuphi. Kumele nazi ukuthi nizofunda lapha, anizile ukuzohlala emjondolo nenze umathanda,” kusho uCele.
Iphini likamengameli wezitshudeni oNgoye, uNdumiso Ntshangase, lithe badumele ngokubehlele futhi badinga ezokuphepha ziqiniswe.
“Akukho obekungenziwa yisikhungo ukuvikela lezi zitshudeni ngoba okwenzekile kwenzeke zihlezi zombili endlini futhi kwasebenza isikhali sasekhishini. Onogada yibona ababe ngabokuqala ukufika lapho kubulewe khona isitshudeni. Yize kunjalo zikhona izehlo lapho izitshudeni zigqekezelwa khona izindlu, zintshontshelwe. Sifuna ezokuphepha ziqine ezindlini zezitshudeni,” kusho uNtshangase.
Ophethe ezokuxhumana oNgoye, uNkk Gcina Nhleko-Mdluli, uthe bashaqekile ngokwenzekile. “Udaba lokuphepha kwezitshudeni siluthathela phezulu. Inkinga esinayo wukuthi kunezindawo esingakwazi ukuzibiya ngenxa yokuthi kuhamba kuzo amalungu omphakathi njengoba umhlaba okwakhiwe kuwo isikole kungewona owaso isikhungo.”
Abafundi abahlala eSphetho Block BB lapho kwenzeke khona isiga bathe basathukile.
USnegugu Ngcobo benoKhethiwe Shezi bathe njengoba bezoqala ukubhala uzivivinyo zokuphela konyaka ngo-Okthoba 14 baphazamisekile ngokomqondo.