‘Uhlahlele’ unina wahuqa ubuthongo
KUBATSHAZWA isihluku somlisa (28) waseNgwavuma okuthiwa uhlahlele unina okwembuzi emuva kokuthi ezame ukumlamula eshaya unina wengane yakhe.
Lo mlisa wasOnaleni, eNgwavuma, ongumakhi, kuthiwa uhlahlele unina, uNkk Maponyane Timbane (56) ngocelemba ngoMsombuluko ntambama, emva kokuthi emlamule enengxabano nonina wengane yakhe abesehlale naye iminyaka emzini wakhe.
Induna yendawo, uMnuz Ephraim Ndlazi, ithe basashaqekile ngenxa yesehlo esenzeke endaweni. Uthe uthole ucingo ngehora lesithupha ntambama lumbikela ngokubulawa kukaNkk Timbane.
“Ngesikhathi ngibikelwa ukuthi u*%7 (emgagula ngegama) useklabhe unina ngocelemba, ngizitshele ukuthi kuthiwa angiphuthume ngizolanda umuntu obedinga ukuyiswa emtholampilo. Ngishaqekile uma ngifika. Ubemhlahlele ngocelemba umzimba wonke kuhle okwembuzi. Bekuyinto obuyibuka kanye kube sengathi ungangaphinde ubuke,” kusho uNdlazi.
Uyise omdala kamsolwa uMnuz Zifo Ntimbane oveze ukuthi ubizwe yinduna emuva kokuthi sekwenzeke isigameko uthe umsolwa ubevame ukumsabisa unina abuye amsole nangokuthakatha.
“Unina bekungabonakali nokuthi ngabe ubenawo yini amehlo nokuthi ayengakuphi. Nasezingalweni ubemgencile. Bekuyinto engabhekeki,” kusho uNtimbane.
UNdlazi uthole ukuthi uNkk Timbane ubehleli nonina wengane kamsolwa ngesikhathi kwenzeka lesi sigameko. Uchaze ukuthi unina wengane kamsolwa ubezobika ukuthi uyamshaya kanti umsolwa uzotheleka egcekeni esephethe ucelemba esuka kwakhe lapho behlala khona.
“Ubuze unina ukuthi uyazi yini ukuthi babangani njengoba bexabana nonina wengane. Ngesikhathi eseqala exabana nonina, unina wengane ubaleke wathatha ingane. Kuyacaca ukuthi ukube akazange abaleke naye ngabe umenze okufanayo,” kusho uNdlazi. Kulesi sigameko kuthiwa ulimaze nomfowabo omncane obezama ukumvimba ngesikhathi ehlasela unina.
Amaphoyisa kuthiwa agasele endlini kamsolwa ngoMsombuluko ebusuku amfica elele esekhumule nezingubo ezinegazi abezigqokile ngesikhathi ehlahlela unina.
Kuthiwa ubenegazi ezandleni kodwa ephika ukuthi ukwenzile lokhu, ethi ubexabana impela nonina kodwa ubengeke ambulale. Umsolwa kuvele ukuthi ungumuntu obevamile ukuthi ahluphe novame ukuphuza utshwala.
UNdlazi uthe namanje umphakathi wonkana uhlukumezekile ngokwenzekile okungangokuthi akazi ukuthi ungamenzani uma kungathiwa uyaphuma njengoba eboshiwe. Uthe umphakathi uthukile ngoba kuyaqala ukuthi kwenzeke isehlo esifana nalesi endaweni, futhi bafisa engathi kungaba ngesokugcina. UNtimbane uthe ufisa ukubona umthetho udlala indawo yawo, aboshwe angadedelwa.
Okhulumela amaphoyisa KwaZuluNatal, uLt Col Thulani Zwane ukuqinisekisile ukuthi umsolwa uboshiwe nokuthi ubhekene necala lokubulala. Uthe bekulindeleke ukuthi avele enkantolo izolo.