Yizani kwiDurban Business Fair ukuze nifunde: Sithole
IPHINI leMenenja kaMasipala weTheku kwezokuthuthukiswa komnotho, uMnuz Phillip Sithole, ligqugquzele abantu ukuthi bahambele iDurban Business Fair ukuze bafunde ngamathuba akhona emikhakheni ehlukene.
USithole uthe njengoba iDurban Business Fair igubha iminyaka ewu-20 yasungulwa kusho ukuthi ziningi izinkundla zokucobelelana ngolwazi futhi kuzogxilwa nasemathubeni eza nobuchwepheshe besimanje.
Uthe abasemkhakheni wezokungcebeleka bazozuza ngoba kuzoba nezinkundla zokucobelelana ngolwazi ezibophele ingqalabutho kwezamafilimu, u-Anant Singh, umlingisi obuye abe ngumqondisi wemidlalo yethelevishini, uLeleti Khumalo, nomlingisi wemidlalo yethelevishini namafilimu uTony Kgoroge.
USithole uphinde wacela abantu ukuthi bangabizi osomabhizinisi abasebenza noMasipala weTheku ngokuthi wosomathenda ngoba leli gama lisetshenziswa kosomabhizinisi abamnyama kuphela.
“Sicela osomabhizinisi babhalise ohlwini lukamasipala ukuze bathole amathenda neminye imisebenzi yebhizinisi. Osomabhizinisi kufanele bazifundise nokugcwalisa amafomu amathenda nokunye okudingekayo uma uzosebenzisana nomkhandlu weTheku,” kusho uSithole.
UMnuz Clive Manci owayengumengameli weDurban Chamber of Commerce and Industries, ucele abantu abamnyama ukuthi bazithande futhi basekane ngoba amavideo awabona ezinkundleni zokuxhumana abantu abamnyama beshayana maningi kakhulu.
Wenze isibonelo sikanogada owashaywa ngabalandeli beKaizer Chiefs eMoses Mabhida Stadium wathi lokhu akwamukelekile.
Ugxeke uhulumeni ngokufuna ukuthuthukisa izwe kodwa engabathintanga osomabhizinisi.
Ubalule ukuthi eChina naseUSA ohulumeni bakhona bavamise ukutshala imali ocwaningweni lobuchwepheshe nolwemikhakha ehlukene basebenzisane nosomabhizinisi.
“Cishe wonke umuntu unomkhiqizo wakwa-Apple okungama-iPhone nokunye, le nkampani yayithola uxhaso ngesikhathi uhulumeni enza ucwaningo lwezobuchwepheshe e-USA. Uhulumeni waseChina naye usebenzisana nosomabhizinisi abathile ukuze athuthuke emikhakheni ehlukene. Thina owethu uhulumeni ufuna ukuletha impilo engcono kodwa akasebenzisani nosomabhizinisi,” kusho uManci.