Bakhala ngoR1.3m oxhase ezoMhlanga
AMAQEMBU aphikisayo eMkhandlwini weTheku ashaya amakhala ngendlela okusetshenziswe ngayo uR1.3 million, okhishwe uMasipala ukuze uxhase izintombi ebezihambele uMkhosi woMhlanga KwaNongoma.
Le mali ibihlukene kathathu uR918 000 wamabhasi, uR280 000 wokudla noR184 000 wendawo yokulala.
Zibalelwa ku-4 000, izintombi zaseThekwini ebeziKwaNongoma.
Emhlanganweni wamakhansela alawula uMasipala eCity Hall, eThekwini izolo, i-IFP neDA bazwakalise ukungenami ngendlela le mali esetshenziswe ngayo.
Ikhansela leDA, uMnuz Heinz de Boer lithe ikhansela labo ebelihambele lo mcimbi libatshele ukuthi izintombi bezilele phansi etendeni kukhaphethi ngoba izipontshi bezingekho.
“Sifuna ukwazi ukuthi kungani izipontshi bezingekho ngoba yaphuma imali yazo ngesikhathi kukhishwa isabelomali sokuxhasa lo mcimbi,” kusho ude Boer.
Uthe ezinye izintombi bezikhala ngendlala ngenxa yokungakutholi ukudla.
“Kusiphatha kabi ukuthi izingane zikhale ngendlala kodwa imali yokudla kade ikhishiwe, sifuna ukwazi ukuthi ngubani odle imali, lowo muntu kumele athathelwe izinyathelo,” kusho uDe Boer.
Umholi wekhokhasi ye-IFP eMkhandlwini weTheku, uMnuz Mdu Nkosi uthe ngeke kuphele ukudliwa kwemali eThekwini ngoba izigilamkhuba kazithathelwa zinyathelo.
UNksz Ntombifuthi Gumede oyikhansela le-IFP elalihambele uMkhosi woMhlanga lithe ezinye
izingane zazilele phansi otshanini ngenxa yokuthi ukhaphethi owawufakiwe wawungenele etendeni lonke.
“Thina sasiphakamise ukuthi
kuthengwe izipontshi zomkhandlu ezizohlala ngoba uMkhosi woMhlanga kuyaziwa ukuthi uba minyaka yonke, lokho kungasiza kakhulu ekongeni imali kunokuthi kuhlale njalo kuthiwa kuqashwa izinto ezigcina zingabonakali,” kusho uNksz Gumede.
Ikhansela le-ANC uNkk Zama Sokhabase, lithe kusekusha kakhulu ukuthi amaqembu aphikisayo asengakhuluma, abuze ngemali ukuthi isetshenziswe kanjani kodwa umbiko ogcwele ungakaphumi.
“Kumele kulindwe kuphume umbiko, yiwona ozobe ususinika isithombe ngokuthi kwenzekeni okwamanje akukho okutheni esingakusho futhi nokukhombana ngeke kuze kusize,” kusho uNkk Sokhabase.