Abazali basola othisha abangacopheleli uma bethandana
KUPHAZAMISEKE ukufunda esikoleni samabanga aphansi iMcopheleli Primary, KwaDabeka abazali besola othisha ngokujola phambi kwezingane.
Izolo, abazali bezingane zakulesi sikole bavimbe amasango esikole ngoba besola othisha abathile ngokujola nokuwotawotana phambi kwazo. Bathe sekunesikhathi izingane zabo zibabikela ngezigameko ezenzeka esikoleni nabathe azibaphathi kahle bengabazali.
Omunye wabazali ongathandanga ukudalulwa uthe ingane yakhe isanda kubuya esikoleni yambamba yamunkonkoshela ngoba ithi ike ikubone kwenziwa ngothisha esikoleni. “Lokhu kuyasikhathaza ngoba kufundisa izingane imikhuba. Lezi zinto aziziboni emakhaya, zizibona zenziwa esikoleni.”
Abazali bathe bafuna ukuthi uMnyango wezeMfundo ungenelele ususe labo thisha abasolwa ngokuthi bayathinteka. Basabise ngokuthi bazoqhubeka nokufika esikoleni uma labo thisha bengasuswa.
Abazali bathe abaphikisani ngokujola kwabantu kodwa bathe kuyabahlukumeza uma izingane sezibona lokhu futhi sezibuya emakhaya zixoxa ngezinto ezingezinhle ezizibona zenziwa ngothisha.
Laba bazali bebebhale emabhodini bethi abahambisani nokujola kothisha phambi kwezingane, besho nokuthi labo ababasolwa ngokujola kufanele baphume baphele esikoleni.
Izolo ukufunda kuphazamisekile njengoba izingane bezibonakala zizidlalela emakilasini kungekho thisha. Kuze kwacishe kwaphela usuku othisha bevalelene emhlanganweni namalungu omkhandlu olawula isikole nabahloli kudingidwa lolu daba.
Okhulumela uMnyango wezeMfundo, uMnuz Muzi Mahlambi, uthe batholile ngezinsolo ezibekwa abazali bathumela abahloli ukuthi bayolubheka udaba. “Asiphikisani nokuthandana kwabantu abadala futhi ngeke singenelele kukhona kodwa asihambisani nokuthi kuphazamise ukufunda esikoleni. Yingakho sesithumele abahloli ukuthi bayosiphenyela ngalezi zinsolo.”
Uthe bazolinda ukuthola okuzobuya nabahloli. Uqhube wathi uma ukubambana kothisha esikoleni kuyafana nokungaziphathi kahle emphakathini futhi bayakugxeka lokhu uma kuwukuthi kuyenzeka.