Aziqokwe izikhulumi emshadweni
KUNINGI okwenza umshado unconywe ngokuthi ubumuhle yingakho abashadayo bethatha izinyanga bewulungiselela. Ngaphandle kobukhazikhazi obusuke bulindeleke emshadweni, abaningi basuke bebhekile nokuthi kuzodliwani. Kungenzeka kuthi sekuhlelwe kahle konke lokhu, umshado woniwe yizikhulumi ezifakwe ohlelweni.
Ike yaba sematheni indaba yomshado ovele ohlelweni lwethelevishini i-Our Perfect Wedding, obekungokaNksz Nkululeko Mkhumbuzi noMnuz Njabulo Mkhumbuzi baseManguzi.
Ekhuluma emshadweni umngani kamakoti, ozibiza ngoMavuyi Vuyi, wathi umkhwenyana asize athengele umkakhe isiqholo ukuze anuke kahle. Le nkulumo ayehlanga kahle kubalandeli bohlelo abathi yaphoxa.
Ngaphandle kwalokhu, kuyenzeka nakweminye imishado abantu babuye bekhexile ngenxa yezinkulumo.
UNkk Sthembile Jali wasoThongathi ukhala ngokuthi ayinakwa eyokuhlela ngobuchule abazokhuluma emshadweni. ÚNkk Jali, oseshade iminyaka eyisihlanu futhi ojwayele ukusiza ukuhlelela abanye imishado, uvumile ukuthi ezinye izikhulumi ziyamosha emshadweni.
“Emishadweni yabamnyama uhlelo lwezikhulumi lusuke lube lude kakhulu. Kwesinye isikhathi kugcina kushuthekwa wonke umuntu ngoba kubonakala sengathi kukhona abazophatheka kabi uma bengafakwanga. Uma ngihlela umshado ngiyabeluleka abashadayo ukuthi bakhethe abantu abajwayele ukukhuluma emicimbini,” kusho uNkk Jali.
UNkk Jali ukhuthaza ukuthi izikhulumi eziningi zifakwe emicimbini yamaBridal Shower ukunciphisa uhlelo lomshado.
Umphumela wocwaningo olwenziwe nguMnuz Norman W Edmund ongumshicileli, uthe kuyasiza ukuzilungiselela uma uzokhuluma kunoma yimuphi umcimbi. Okwenza abanye bamoshe wukuthi bakhulumela safuthi.
Uthe akudingeki ukhulume isikhathi eside kunoma yimuphi umcimbi. Ugcizelela ukuthi uma ukwazi ukuzilungiselela ungayigoqa inkulumo kodwa ibe nohlonze. Abanye basuke bezama ukwenza amahlaya emcimbini bethi bayanandisa kanti sebeyamosha kakhulu.