Bayaziqhenya abenkampani ekhiqize iBaby Mamas
“KUYATHOKOZISA ukuthi ugcine uthela izithelo umsebenzi wethu weminyaka emithathu obungelula ngoba besihlala sikhala sisebenza nasebusuku.”
Lawa ngamazwi ashiwo intokazi eyazakhela igama yethula izinhlelo zezingane ekuqaleni kweminyaka yo-2000, uStephina Zwane.
UStephina noSalamina Mosese, banenkampani yokuqopha nokukhiqiza izinhlelo, iSorele Media esanda kukhiqiza ifilimu ethi Baby Mamas, ekhuluma ngempilo ephilwa abantu besifazane abanezingane emphakathini abahlala kuwo.
Bekhuluma ngempumelelo yefilimu ohlelweni iV-Entertainment, bakuvezile ukuthi kuyathokozisa ukwazi ukuthi ngo-Okthoba 12 ifilimu izobe iqala ukubonakala emabhayisikobho ehlukene kuleli.
“Ngesikhathi ngishiya ekubeni wumethuli wezinhlelo ngangena emkhakheni wamafilimu ngathi ngifika kuwona ngabona ukuthi ufana nomdlalo okumele usebenze kanzima kuwo ukuze uphumelele. Lena yifilimu yethu yokuqala kodwa hhayi ngingasho ngingananazi ukuthi sicishe saguga sibancane ngenxa yokuba matasa nezingqinamba esibhekene nazo,” kusho uStephina.
Uthe kuyajabulisa ukuthi ekugcineni baze baphumelela njengoba sekusele amasonto ambalwa abantu babone umsebenzi wabo.
“Ukuba ngabantu besifazane abamnyama nje kule ndima bekungelula kodwa ngoNkulunkulu konke kwenzeka,” kusho uStephina.
USalamina uthe waziwa ngokwethula izinhlelo nokulingisa, ukuba uphrojusa yikhona okusekusha kule ndima akuyo.
“Ngiyakuthanda ukuba wumlingisi, yingakho ukuba wumqondisi kule filimu ngivele ngakushiyela yena mina ngagxila ekubeni uphrojusa nasekulingiseni,” kuchaza uSalamina.
Uthe ekuqaleni kobungani babo babesho ukuthi baya kude emkhakheni wethelevishini.
Kule filimu kulingisa izintokazi esezizakhele igama okukhona kuzo uDineo Ranaka, Thembisa Mdoda, Salamina Mosese noKay Smith.