Kuzohlonishwa igalelo likaFelicia
UZOTHELEKA kuleli ngoLwesihlanu owayengumethuli wezinhlelo kuthelevishini, uFelicia Mabuza-Suttle, njengoba ezohlonishwa inkampani, i-Empowaworx Events & Communications, eyenza umcimbi owaziwa ngeGauteng High Impact Leadership Summit 2018.
Lo mcimbi okuhlonishwa kuwo osomabhizinisi emkhakheni eyahlukene, uzoba seSoweto Theatre ngoSepthemba 27.
Ekhuluma ngokuba yingxenye yalo mcimbi, uFelicia uveze kuthi ukujabulele ukuthola ithuba lokuza kuleli.
“Ngiyabonga kakhulu kule nkampani ngokungimema. Ngijahe kabi ukuya kulo mbuthano njengoba ngingangabazi ukuthi siyojabulela okuningi.
“Ngempela akukho ukuhlonishwa okukhulu nokudlula ukuhlonishwa ezweni ozalelwe kulona, ngiyabonga Mzansi,” kusho uFelicia.
Lo mcimbi ngonyaka odlule uhloniphe usomabhizinisi onenxanxathela yezitolo eSoweto, uRichard Maponya.
Emcimbini walo nyaka, kuzobhekwa ezintweni ezithinta ibhizinisi kuleli nasemazweni omhlaba ahlukene.
Ezikhulumini ezizobe zikhona kubalwa uNgqongqoshe wamaBhizinisi Amancane uLindiwe Zulu, uThuli Madonsela, umsakazi ophinde abe ngumphathi weTouch HD uTbo Touch, usomabhizinisi obuye abe ngumculi uSibusiso “DJ Sbu” Leope nabanye.
USimphiwe Masiza, ongumphathi wenkampani ehlela lo mcimbi, uthe kulo mcimbi ngeke nje bagcine ngokukhuluma ngezinto ezihlukene zamabhizinisi kodwa nokuhlonipha le ngqalabutho kusho lukhulu kubona.
“UFelicia ngumuntu esingeke simkhohlwe kalula njengoba eshintshe izinto eziningi futhi wakhuluma nabantu abaningi ngezinto ezihlukene ngesikhathi sisanda kungena nje eminyakeni yenkululeko. Uzokhuluma ngezinto ezihlukene ezenzeke empilweni yakhe ekuthelevishini nala asekhona namanje ezweni laseMelika,” kuchaza uMasiza.