Kusolwa inkinga yemali isikhulu siba yinhlekisa
KUSOLWA inkinga yezimali kuMasipala wasoThukela kungena ehlazweni iPhini leMeya ngemuva kokuba imoto yalo yomkhandlu eyiToyota Fortuner, ibanjwe igaraji likaphethroli yalala izinsuku ezimbili ngoba ingekho imali yokukhokhela uphethroli.
Lesi sigameko siphenduke undabamlonyeni ngisho ezinkundleni zokuxhumana kuhlekiswa ngoNkk Nombali Mchunu-Sibiya ngokufaka uphethroli maqede wehluleka ukukhokha uR1 220 ngoba ikhadi likamasipala lingenamali.
Le ndaba isatshalaliswe ikhansela leNational Poeple’s Ambassador (NPA), uMnuz Nathi Mthethwa.
“Sibuhlungu ukuthi isimo sezimali sesifike kuleli zinga oThukela. Yingakho thina sikholelwa ukuthi lo mkhandlu udinga ukuhlakazwa ngoba imali awusenayo. Ngikhuluma nawe nje, abasebenzi abaholanga ngosuku olufanele ngenyanga eyedlule. Akugcini lapho kade kunesiteleka esidale umonakalo, abasebenzi becasulwa ukuthi abaholanga, bavele baqoka ukuthwala indle bayoyithela ezimotweni zezikhulu. Buka nje ihlazo iPhini leMeya selishaya indesheni licela ukugitsheliswa ngoba ikhadi lomkhandlu likaphethroli belingenamali,” kusho uMthethwa.
Uthe le moto ihlale kusuka ngoMgqibelo yaze yakhishwa ngeSonto ntambama.
Lo masipala usanda kuphucwa amandla wabuyiselwa kumlawuli, uNgqongqoshe wezokuBusa nokuBambisana neziNdaba zoMdabu, uNkk Nomusa Dube-Ncube. Lithintwa iPhini leMeya livumile ukuthi imoto igcine ihlala egaraji ngoba ingekho imali yokukhokhela uphethroli. “Okungelona iqiniso kulolu daba ukuthi yimi obeshayela imoto. Mina bengingekho kodwa imoto ibihamba abaqaphi bami. Ngithintwe yibo bengibikela ukuthi bafake uphethroli kodwa inkinga ikhadi alinamali. Ngize ngakhipha imali yami ukuze idedelwe. Ngiyafisa kucace ukuthi lokhu akwenzekanga ngoba imali ingekho emkhandlwini kodwa kube ukuthi amakhadi esiwasebenzisayo abesephelelwe isikhathi engavuselelwanga. Le moto isibuyile isayolungiswa ngoba bese kufike isikhathi sokuba iyohlolwa,” kusho uNkk Mchunu-Sibiya.
Uthe umasipala unayo imali futhi akulona iqiniso ukuthi usuwile ngoba ngisho udaba lokungaholi kwabasebenzi kube ukuthi bekunenkinga encane nebhange labo abalisebenzisayo lakwaFNB .
Uveze ukuthi njengoba umkhandlu wabo usufakwe ngaphansi komlawuli akusho ukuthi banenkinga yezezimali ngoba umlawuli akakafiki.
Lo mkhandlu okwesibili ubuyela kumlawuli.