Bathole incazelo kwabeGEPF
BAPHOXEKILE abanye abasebenzi bakahulumeni abebethembe ukuthi bazophuma nezizumbulu zemali uma bevuma ukudilizwa.
Lokhu kugqame ngoMsombuluko, emhlanganweni obuhlelwe yisikhwama esibhekele izimpesheni zabasebenzi bakahulumeni, obusesikoleni eSpringlake High, eHlathi Dam, eNquthu.
Emhlanganweni bekugcwele othisha, amaphoyisa nabahlengikazi, kuzocaciselwa umphakathi ngezinkulumo ezisabalele zokuthi uhulumeni ufuna ukudiliza abasebenzi abangu-30 000 bese ebanxephezela ngezigidi zamaRandi.
Kulo mhlangano, abeGovernment Employees Pension Fund (GEPF) batshele abantu ukuthi akulona iqiniso ukuthi bazodilizwa, ikakhulukazi abasebenzi asebebadala bese kufakwa intsha.
Omunye wabasebenzi beGEPF, uMnuz Sbusiso Khuzwayo, obesethimbeni ebelisiza ukuphendula imibuzo, uchazele abantu ukuthi okwamanje udaba lokudilizwa alukaphothulwa kodwa lusaxoxwa.
Okunye kube ukuqwashisa abasebenzi ukuba baqinisekisa ukuthi imininingwane yabo yamafa neyemindeni ihlale inolwazi olusha ukuze bangabi nankinga uma beshona, abomndeni sekumele bathole imali.
UMnuz Owen Nkomo, weNkunzi Investments, ukushayele ihlombe ukuthi iGEPF ihambele emakhaya icacisele abantu ngodaba lokudilizwa kwabasebenzi bakahulumeni.
“Ziyadingeka izigcawu ezifuze lesi ukuze abantu bakithi bangazitholi bekhohliswa. Batshelwa amanga kuthiwa uma bedilizwa bazothola imali eningi. Lokho kuyingozi ngoba abanye bazolingeka bangene ezikweletini ezingenasidingo ngoba bethembe ukuthi bazothola imali eningi,” kusho uNkomo.
Ngesonto eledlule, uNgqongqoshe wezaBasebenzi bakaHulumeni nokuPhatha, uNksz Ayanda Dlodlo, uyichithile imibiko yokuthi bazodiliza abasebenzi abangu-30 000 eminyakeni emithathu ukuze kongiwe uR20 billion.
Uthe kunalokho uhulumeni usabuka izindlela zokuhlela abasebenzi okungaba ukuvumela abantu asebebadala ukuba bathathe umhlalaphansi isikhathi singakafiki ngaphandle kokuba imihlomulo yabo ihleshulwe.
Okunye ake wakuveza ukuthi babheka namaqhinga okusiza abadala babacije ngokwamakhono azohambisana nesikhathi samanje.