ULarsen nenselelo kubadlali bakhe ngeSundowns
USEZINGQONDWENI zabadlali bami ukuthi siyayehlula kumbe siyayivumela ukuthi izichanasele ithathe amaphuzu ngendlela ethanda ngayo iMamelodi Sundowns.’
Lawa amazwi kaClinton Larsen opheka iLamontville Golden Arrows ezokwamukela iSundowns kowe-Absa Premiership namuhla ngo-7.30 ebusuku ePrincess Magogo Stadium, KwaMashu.
ULarsen ukusho lokhu enabela leli phephandaba ngezinhlelo anazo ngalo mdlalo okusemqoka ukuthi awunqobe kwazise ulahle amaphuzu eqenjini elisuka kwiNational First Division (NFD), iHighlands Park ebashaye ngo 2-1 ngeSonto. Yize kunjalo uLarsen uyazi ukuthi akukona kuphela ukuthi ufuna ukulungisa iphutha kepha noPitso Mosimane weSundowns unomuzwa ofanayo kwazise nezakhe zilahle amaphuzu zibambana naMaZulu ngo 3-3 ngosuku olufanayo.
“Konke kulele ezingqondweni zabadlali. Akukho okuyisipesheli engingakutshela bona kepha indaba ikubona ngaphakathi ukuthi bayavuma yini kufike iqembu ngoba lithathwa njengelikhulu bese lizitapela amaphuzu lihambe. Ngisadlala ngiyazi ukuthi ngangingeke ngikuvume lokho ngakho-ke ngizama ukukufaka ezingqondweni zabo abadlali ukuthi banezinyawo ezimbili ngendlela efanayo nabadlali beSundowns futhi banawo amava okuyithela othulini ngoba sebeke bakwenza lokho phambili,”kusho uLarsen.
Uqinisekise ukuthi nakulo mdlalo bazobe bengekho oSiyanda Zwane, Velemseni Ndwandwe noZolani Nkombelo bobathathu abalimele.
“Ngeke adlale uZwane kodwa useqalile ukuziqeqesha nabanye. Sishayekile ngokulimala kwakhe kodwa abadlali abavale isikhala bahle kakhulu.”
ULarsen akazikhathazi ngokuhlelela abadlali beSundowns ngabodwana kodwa lokhu akusho ukuthi akabazi futhi akakhulumi ngabo nabadlali bakhe. ISundowns idlale ngesikimu esihluke kakhulu kwesejwayelekile ibuya seliyoshona imiswe kabi Usuthu ngeSonto.
“Ngisho ngabekudlala bani iSundowns inabo bonke abadlali ongabacabanga. Okuhle ngabo ukuthi siyabazi bonke ngisho ngabe imuphi ozoqala. Abadlali bami bayabazi ubuthaka beSundowns. Iqiniso ukuthi uma ulilandela ngendlela ibhola kufanele ubazi ubuthaka beSundowns.
“Ngeke ngande kakhulu kodwa abadlali bami bayakwazi okufanele bakwenze ukuze amaphuzu ezosala. Kusemqoka nokho ukuthi siwasebenzise ngendlela amathuba esiwatholayo bese sikhulekela ukuthi lingasilandeli ibhadi ebelisimele sihlawuliswa ngamaphenathi angekho emdlalweni odlule. Nginabo abadlali abangamelana nanoma yikuphi okulethwa yiSundowns kodwa konke kulele ezingqondweni zabadlali,”kusho uLarsen.