UMere ufuna izicoco eziningi zeligi
UMAKADEBONA uVuyo Mere ogijimela iBidvest Wits ufuna ukulinganisa irekhodi elibekwe uDaine Klate lokunqoba izicoco eziningi ze-Absa Premiership.
UMere, odlala emuva ophikweni lwesokudla, ngomunye wabadlali abambalwa asebezinqobe zonke izicoco kwiPremier Soccer League (PSL).
UMere (34) usedlale amasizini awu-17 kulesi sigaba kusuka ngo-2001 esagijima kwiHellenic (ayishiye ngo-2004), Mamelodi Sundowns (adlale kuyona kusuka ngo-2004 washiya ngo-2011), Moroka Swallows (adlale kuyona isizini eyodwa ka-2011/2012), Platinum Stars (adlale kuyona kusuka ngo-2011 kwaze kwaba isizini edlule), njengoba esekwiWits.
Asikho isicoco angakaze asinqobe kusuka kweseligi, Telkom Knockout, Nedbank Cup, MTN 8. Ngokusho kukaMere, usakulambele kakhulu ukudlala nokunqoba izicoco. Isifiso sakhe esikhulu wukufica irekhodi likaKlate onqobe izicoco eziyisithupha ze-Absa Premiership azinqobe neSuperSport United (ezintathu), Orlando Pirates (ezimbili), neBidvest Wits (esisodwa).
“Ngifuna ukuqopha umlando ebholeni laseNingizimu Afrika nakwiWits. Ngisakulambele ukunqoba izicoco, nakuba sengizinqobe zonke izicoco kodwa angiboni ukuthi sekwenele esengikwenzile ebholeni laseNingizimu Afrika. UKlate uyena onerekhodi lezindebe zeligi eziningi. Lokho kodwa nje kuyakhombisa ukuthi uma ungumdlali awusoze wadela yizicoco,” kusho uMere.
I-Platinum Stars ngelinye lamaqembu uMere ahlale kuyona iminyaka eminingi – uhlale eyisishiyagalolunye. Ngesizini edlule iDikwena igawulwe yizembe, njengoba isigijima kwiNational First Division (NFD). Isiyaziwa ngeCape Umoya United njengoba isizinze eKapa.
Phakathi kwemibiko eke yasabalala ngesikhathi kwenziwa izinguquko zabaphathi kwiDikwena wukuthi kunabadlali abaxoshwa kabuhlungu. Abanye bashiye sekukubi eqenjini eliphekwa nguRoger De Sa ophinde abe ngomunye wabaphathi balo.
Nokho uMere uthe yena uhambe kahle kwiStars, empeleni bamnika izibusiso esehamba.
“Ngangifuna ukuhlala kwiDikwena ngoba ngangifuna silwe sizame ukubuya kwiNFD. Nokho abaphathi beqembu bahlala nami phansi bangitshela ukuthi ngingumdlali oseqophelweni eliphezulu kakhulu ukuthi ngingadlala kwiNFD, bangitshela ukuthi angifune iqembu kwiPremiership ngiqhubeke ngidlale khona. Ngaleyo ndlela ngashiya iphunga elihle, namanje sisaxhumana nabaphathi bakhona ngoba yibona abanginika izibusiso,” kusho uMere obelokhu ebonge njalo uMdali ngokumnakekela yonke le minyaka.