‘Angisona isahluleki ngokubuya e-Egypt’
UMDLALI omusha weMamelodi Sundowns, uPhakamani Mahlambi, akaziboni njengesahluleki ngokubuyela eNingizimu Afrika ngemuva kwesizini eyodwa enezinkunzi zase-Afrika, i-Al Ahly yase-Egypt.
UMahlambi (21) ubingelele ngegoli emdlalweni wakhe wokuqala bedlala naMaZulu FC ngempelasonto. Ubebonakala ukuthi usazoba wuhlupho uma esengene kahle egiyeni lomqeqeshi uPitso Mosimane.
Ngesikhathi ehamba wayekade esize iqembu lakhe elidala, iBidvest Wits, lanqoba isicoco seligi.
Yize emncane kodwa unamandla uma ebhekene nezitobha futhi unejabune okwenza kube nzima ukumvimba uma ephethe ibhola.
“Angicabangi ukuthi ngiyesehluleki, vele ngiyazi abanye abantu bazobona kanjalo ngoba bahlezi benemibono yabo. Ngiqoke ukubuya ukuze ngizoqala yonke into phansi ngizilungiselele ikusasa. Yonke into ibiyinhle laphaya (e-Egypt) ebengikhona. Ngibuye ngoba ngifuna ithuba lokudlala ngibuyise nefomu yami engangikuyona ngaphambi kokuthi ngihambe,” kusho uMahlambi odabuka eVryheid, KwaZulu-Natal.
Njengoba eseqalile washaya igoli uthe akafuni ukuzicindeza ngokuzibekela isibalo sawo.
“Into engiyifundile wukuthi ngiyazicindeza. Ngifuna ukushaya amagoli azokwazi ukusiza iqembu lizuze lokhu elikuhlosile. Uma ngibeka isibalo, uma ngingasafiki kusona abantu bazobe sebesho ukuthi wasithembisa amagoli angaka.”
UMosimane uthe ubona uMahlambi esivala isikhala sikaPercy Tau.
Yena lo mdlali uveze ukuthi ukusayiniswa kukaTau yiqembu elidlala kwi-English Premiership (iBrighton & Hove) kusho lukhulu ngebhola laseNingizimu Afrika.
“Uma sinabadlali abawuhlobo lukaTau abadonsa amehlo amaqembu ase-England kusho ukuthi sinabo abadlali abangabhekana nabaphambili emhlabeni.”
Ebuzwa ukuthi usafisa ukudlala ngaphandle kwezwe, uthe: “Akungatshazwa ngisafuna ukubuyela phesheya kodwa okwamanje ngigxile kwiSundowns. Nginenkontileka yeminyaka emihlanu kulesi sikhathi engisihleli ngingakwazi ukusebenza ezintweni engifuna ukuzizuza.”