UNdengane ucacisa ngemibandela yeCeltic
ISITOBHA seBloemfontein Celtic, u-Alfred Ndengane, sicacisa ngokuqoqa amaphuzu ngaphandle kokulambela ukuzuza okuthize kweqembu ngaphansi komqeqeshi uSteve Komphela.
ICeltic ayikahlulwa kusukela kuqale isizini ka-2018/2019. Emidlalweni eyisihlanu, iwine emine, yadlala ngokulingana kowodwa ebambane kuwona neKaizer Chefs ngo 2-2.
Nakuba wonke amehlo esebheke kwiPhunya Selesele kule sizini kodwa uNdengane uphumele obala ngokuthi akukho abazibekele ukukuzuza kule sizini kwazise basakha isisekelo. UNdengane uwine umklomelo womdlali ovelele ka-Agasti, i-Absa Premiership Player of The Month uKompela wahlabana ngoweAbsa Premiership Coach of The Month. Bekuyimiklomelo yokuqala kusuka kuqale isizini.
“Sifuna ukuwina imidlalo eminingi kule sizini. Awukho umgomo esizibekele wona njengokuthi sifuna ukuqeda kwiTop 8 noma kuphi. Sakha isisekelo. Uma wakha indlu, usuke ungazi noma izowa noma cha. Uyakha uzitshela ukuthi izoqina ime. Yilokho esikwenzayo ngokuzama ukuqoqa amaphuzu amaningi, akunandaba ukuthi siqeda kuphi kwi-log. Inqobo nje uma sizinikele ngakho konke. Abaphathi basitshele ukuthi asiwine imidlalo eminingi, siqoqe amaphuzu amaningi,” kusho uNdengane.
UKomphela uzobhekana nabaqhashi bakhe bakudala uma iCeltic seyamukela iMaritzburg United emdlalweni weligi eDr Molemela Stadium, eBloemfontein ngeSonto ngo-3 ntambama. I-Maritzburg, efinyelele kowamanqamu weNedbank Cup ngesizini edlule, ihlezi emsileni we-log yePremiership emuva kwemidlalo emine. Ayikaze iwine kule sizini.
“Kuzoba wumdlalo onzima ngoba balwela ukusuka lapha bekhona, thina sisendaweni yesibili kwi-log. Bazoza kithina. Kufanele sizilungiselele ukudlala umdlalo onzima. Ngesizini edlule sithwale kanzima kwiMaritzburg. Sidlale nayo kathathu, sahlulwa kwemibili, sawina owodwa. Lo mdlalo uzoba nzima futhi kufanele sishintshe indlela esicabanga ngayo sazi ukuthi alikho iqembu elikhulu, alikho elincane kwiligi,” kusho uNdengane.