I-Sharks ivivela ukuhlangana neLions

APHO sizohlangana kahle khona, ngiyafunga kuzokhala abantu’. Le nkulumo esakusonga ikhulunywe uRobert du Preez Jnr odlala i-fly half kwiCell C Sharks, engayazi induku selokhu kuqale isizini yeCurrie Cup ka-2018.

UDu Preez ukhuluma kanjena nje, iSharks izodlala neXerox Golden Lions emdlalweni obhekwe ngabomvu kwiCurrie Cup, ngoMgqibelo, eKings Park Stadium ngo-5.15 ntambama.

Uthe kungenzeka bahlangane kahle uma sebebhekene nezimbangi zabo ezinkulu iLions kulo mdlalo.

“Ngokwami asikahlangani kahle, kukhona amaphutha esisenawo, nokuthatha izinqumo ngendlela engavuthiwe kahle. Uma singahlangana kahle, ngiyafunga akekho ozomelana nathi kule sizini kwiCurrie Cup. Ngiyafisa futhi lokho kuhlangana kwethu, kwenzeke kule mpelasonto,” usho kanje uDu Preez ngesikhathi beqeda ukuziqeqesha eKings Park.

Ziya kulo mdlalo nje, iSharks isendaweni yesine kwi-log ngamaphuzu awu-15 emidlalweni emithathu. ILions isendaweni yesibili ngamaphuzu awu-16, nakuba ngeledlule ilotsholwe ompetha abavikela lesi sicoco iDHL Western Province ebabhubhudle ngo 65-38.

UDu Preez uthe akumkhathazi ukuthi kule mpelasonto kuzobuya isethenjwa seLions ebesidlala kumaBhokobhoko uRoss Cronje oyi-scrum half.

“Ngiyazi ukuthi kuleli sonto kuzobuya uRoss (Cronje), owuhlupho oluyisimanga siyakwazi sonke lokho. Siyazi kahle kamhlophe ukuthi sibhekene nobani kule mpelasonto, futhi okwenza isimo sibe nzima kakhulu ukuthi bashaywe kabuhlungu ngeledlule yiProvince. Engakuqaphela ukuthi iLions noma yadliwa kodwa yashaya inqwaba yama-try, ngakho lokho kubenza babe yiqembu elaziyo ukuthi i-try ishaywa kanjani, kuzofanele siqaphele kakhulu.”

Ukushaywa kweLions ngeledlule, kuyenza ize eThekwini inesilonda esibhibhayo, okungasho ukuthi ingafuna ukuvuka ngeSharks, ngaleyo ndlela ifake ingcindezi kwiProvince esicongweni se-log.

“Ukushaywa akukaze kube mnandi kunoma ngubani. Silindele ukuthi bafike bevutha bhe. Ngaphandle nje kwalokho, vele umdlalo wethu neLions uhlezi uzoba nzima ngoba siyizimbangi.”