I-DBF inike “imbokodo” inkundla yokulolwa
I-WOMEN Empowerment Breakfast, ebiyingxenye ye-Durban Business Fair (i-DBF), eqhubeka e-Durban International Centre, ifeze umbono wokuba yisigcawu sokucija abantu besifazane.
Lesi sithangami, esihlelwe wuMasipala waseThekwini, nesigubha iminyaka ewu-20 kulo nyaka, ngesokuhlomisa abantu besifazane ngamasu nokubavulela amathuba akhona kwezamabhizinisi nasemikhakheni elawulwa ngamadoda sidonze izikhulumi ezinohlonze.
Izikhulumi ebezikhona wumlingisi nosomabhizini kwezemikhiqizo yobuhle nokukhiqizwa kwemidlalo yethelevishini u-Connie Ferguson, umphathi wamatilosi uLondi Ngcobo, uDkt Claudine Hilton waseMancosa nombhali nesishoshovu samalungelo abantu besifazane uNkk Elinor Sisulu.
Zonke izikhulumi zihambisene nesihloko sosuku esithi: “She grows. She inspires. She leads,” phecelezi umuntu wesifazane uyadlondlobala, uyakhuthaza, uyahola.
Ivulwe yiPhini leMeya uFawzia Peer, ogcizelele ukuthi umkhankaso wokufukula abantu besifazane useqhulwini ezinhlelweni zikaMasipala.
Uthe yiphupho likaMasipala ukubona abantu besifazane bechuma kuyo yonke imikhakha, yingakho kulo nyaka ubeke u-R1.2 million ukubaxhasa.
Wenze isibonelo ngosizo lwezimali nezinye izinsizakusebenza oluqondene neQoqo lwezaMansi asoLwandle. Uthe bangaphezu kwenkulungwane abantu besifazane abakwi-database, ngakho bangazithambisi.
Uthe: “Sizibophezele ekuboneni abantu besifazane bengena emikhakheni elawulwa ngabantu besilisa.”
Isikhulumi esiqavile uConnie akaphoxanga esephumela eshashalazini elandisa ngohambo lwakhe endleleni yokuba wusomabhizinisi ovelele.
U-Connie ulandise ngempilo yakhe, wenaba ngokuthi kwenzeka kanjani ukuthi asuke ekubeni wumlingisi oyintandokazi kwiGenerations, uKarabo Moroka, wagcina esewumnikazi weFerguson Films, awumnikazi wayo nomyeni wakhe uShona. IKHASI ELIKHOKHELWE
Uphethe ngelithi: “Ungapheleli ekuzibukeni njengentombazane yaselokishini kodwa landela iphupho lakho. Uma ngingakwenza, kusho ukuthi wonke umuntu (wesifazane) angakwenza”
Ngayizolo, ngoLwesithathu, kube nedili lapho kuhlonishwe khona osomabhizinisi abavelele nezingwazi zosomabhizinisi abamnyama.
Indikimba yesikhulumi sosuku, uDkt Xolani Mkhwananzi oyiPhini likaSihlalo we-Public Investment Corporation, ebiqondiswe kosomabhizinisi, ibithi bangabesabi ubuxhakaxhaka kulesi sikhathi sobuchwepheshe. Ubuchwepheshe bubeka amabhizinisi kwelinye izinga, lichume, kwakheke namathuba emisebenzi.
Ime kanje imiklomelo: I-Lion’s Den Emerging category: • I-Bros (Pty) Ltd; • I-Get 2 Natural Beauty. Established category: • I-Women’s Vision Primary Co-operative; • IDudu and Sipho (Pty) Ltd. Entrepreneurial excellence category: • IManelise Group cc; • IKasi Brothers Events; I-Intermediate school’s entrepreneurship category: • ISibusiswe High School yaseMbumbulu; • IVelabahleke High School yaseMlaza; • INanda Seminary yaseNanda. Ama-SMME Excellence Awards Awentsha: • I-Harvest from Heaven Foods. Awabasemakhaya/ nasemalokishini: • I-Woman’s Visionary Primary Co-Operative. Awabesifazane: • I-MMESE Risk Consulting. I-Long-standing Award: • Amabheshu Innovators. I-Special Recognition Awards: • UThemba Ngcobo; • U-Rajen Reddy; • UNhlanhla Gasa. Lifetime Achievement Award: • U-Don Mkhwanazi. Phakathi kwemiklomelo enqotshiwe kube wu: • R10 000 owukheshi; • I-iPad; • U-R20 000 wosizo lwezinsizakusebenza; • Ubulungu be-Durban Chamber of Commerce buka-2019; • Izifundo zamabhizinisi zikaR 10 000.
Kusasa, uLwesihlanu, kuya kuMsombuluko i-DBF Exhibition izoba ne-Street Market, i-Techzone, i-International Pavilion, i-Fashion, Beauty and Style masterclass, i-Youth Connect Summit, i-Business of Filmmaking Masterclass, i-Business of Music Production Masterclass nokunye.
Ngeminye imininingwane ungavakashela ku-Facebook ku: @ Durban Business Fair, ku-Twitter uthi: @ DBNBusinessFair ku-Instagram: Durban_Business_ Fair